"Türk xalqlarının birliyi ideyası əsrlər boyu formalaşıb" - DEPUTAT

"Birinci Türkoloji Qurultay ilk dəfə 1926-cı ildə Bakıda keçirilib. 100 il sonra keçirilməsi təşəbbüsü Prezident İlham Əliyev tərəfindən 2025-ci il oktyabrın 6-7-də Qəbələ şəhərində keçirilən Türk Dövlətləri Təşkilatı Dövlət Başçılarının 12-ci Zirvə Görüşündə irəli sürülüb", - bunları Sonxeber.az -a danışan deputat Müşfiq Cəfərov deyib:

"Türk xalqlarının birliyi ideyası əsrlər boyu formalaşıb və bu yolda böyük maarifçilər, alimlər və ziyalılar mühüm xidmətlər göstəriblər. Müasir dövrdə türk dövlətləri arasında əməkdaşlığın və qarşılıqlı əlaqələrin möhkəmlənməsi Birinci Türkoloji Qurultayın irsinin davamıdır.
Prezident İlham Əliyevin çıxışında Birinci Türkoloji Qurultayın qərarlarının Türk Dövlətləri Təşkilatının humanitar layihələrinin ideoloji bazası kimi təqdim olunması məhz bu kontekstdə xüsusi məna kəsb etdiyini xüsusi qeyd edib. Tarix göstərir ki, davamlı siyasi əməkdaşlıq yalnız ümumi maraqlarla deyil, ortaq düşüncə mühiti ilə də möhkəmlənir.
Birinci Türkoloji Qurultayın yüz illiyi münasibətilə keçirilən tədbirlərin geosiyasi əhəmiyyəti olduqca geniş sahələri əhatə edir. Türk dünyasının gələcəyini yalnız ortaq keçmişə istinad edən mədəni birlik kimi deyil, ortaq bilik istehsalı, humanitar institutlar və elmi əməkdaşlıq üzərində qurulan strateji məkan kimi təsəvvür edilir. Bu baxımdan Birinci Türkoloji Qurultay tarixdə yalnız mühüm elmi hadisə deyil, türk dünyasında institusional humanitar inteqrasiyanın ilk sistemli modeli kimi qiymətləndirilir. Birinci Türkoloji Qurultayın irsi təkcə tarixi yaddaş elementi kimi deyil, türk xalqlarının gələcək humanitar və intellektual arxitekturasının formalaşmasında mühüm mənbələrdən biridir".

Telegramda izləyin