Qara çayı niyə çox içməlisiniz? - SƏBƏB

Araşdırmalar göstərir ki, qara çayın müntəzəm istehlakı orqanizmin bir neçə vacib sisteminə müsbət təsir göstərə bilər. Mütəxəssislərin fikrincə, bu içki ağız boşluğunun sağlamlığını qorumağa, ürək-damar sistemini dəstəkləməyə və hüceyrələri zədələnmədən qorumağa kömək edir.

Lent.az xarici mediaya istinadən xəbər verir ki, qara çayın tərkibində güclü antioksidant hesab olunan çoxlu miqdarda polifenollar var. Bu maddələr oksidləşdirici stresslə mübarizə aparır və sərbəst radikalların orqanizmə vurduğu zərəri azaltmağa kömək edir. Araşdırmalardan birində müəyyən edilib ki, qara çay diş ərpinin əmələ gəlməsini azalda və kariyesin yaranmasına səbəb olan bakteriyaların çoxalmasını ləngidə bilər.

Mütəxəssislər hesab edirlər ki, çayın tərkibindəki polifenollar bəzi zərərli mikroorqanizmlərin inkişafı üçün əlverişsiz mühit yaradır. Qara çayın ürək-damar sağlamlığına da müsbət təsiri qeyd olunur. Tədqiqatların nəticələrinə əsasən, gündə ən azı üç fincan qara çay içən insanlarda insult riski daha aşağı olur.

Alimlər bunu çayın tərkibindəki bioloji aktiv maddələrin yüksək miqdarı ilə əlaqələndirirlər. Bundan əlavə, qara çayın tərkibindəki antioksidantlar toksik maddələr, spirtli içkilər və siqaret tüstüsünün təsiri nəticəsində DNT-də yaranan zədələnmələrə qarşı hüceyrələri müəyyən dərəcədə qoruya bilər. Oxşar faydalı birləşmələr meyvə və tərəvəzlərdə də geniş yayılıb.

Tədqiqatçılar həmçinin qara çayın müntəzəm istehlakı ilə bəzi xərçəng növlərinin yaranma riskinin azalması arasında mümkün əlaqəni araşdırırlar. Onların sözlərinə görə, polifenollar və katexinlər bəzi onkoloji xəstəliklərin profilaktikasında rol oynaya biləcək maddələr kimi öyrənilməyə davam edir.

Bununla yanaşı, həkimlər vurğulayırlar ki, qara çay dərman vasitəsi deyil və heç bir halda müalicəni və ya sağlam həyat tərzini əvəz etmir. Lakin əks göstəriş olmadıqda, onun normada istehlakı balanslaşdırılmış qidalanmanın faydalı hissəsi ola bilər.

Telegramda izləyin