Supermarket almaları təhlükəlidirmi?

Supermarketdən alınan almalar sağlam qida hesab olunsa da, onların satışdan əvvəl keçdiyi emal prosesi bəzi suallar yaradır. Avstraliyalı qastroenteroloq Pol Frums mağazalarda satılan almaları niyə yemədiyini və bunun səbəblərini izah edib.

Lent.az xarici mediaya istinadən xəbər verir ki, alma təbii olaraq nazik mum təbəqəsi ifraz edir. Bu təbəqə meyvəni qurumaqdan və xarab olmaqdan qoruyur. Lakin sənaye emalı zamanı almalar yaxşıca yuyulduğu üçün bu təbii qoruyucu qat da aradan qalxır. Bunun əvəzini çıxmaq və məhsulun saxlanma müddətini uzatmaq üçün almaların üzərinə çox vaxt süni qida mumu çəkilir.

Süni mumun yaratdığı risk nədir?

Həkimin fikrincə, əsas problem mumun özü deyil, onun altında qala bilən pestisid və insektisid qalıqlarıdır. Süni mum bu maddələrin meyvənin səthində qalmasına səbəb ola bilər və onları adi su ilə tam təmizləmək çətinləşir.

Pol Frums bunu nümayiş etdirmək üçün supermarketdən aldığı almanın üzərindəki qalın mum qatını bıçaqla təmizləyərək göstərib. O bildirib ki, insanların çoxu almanı qabığı ilə birlikdə yeyir. Halbuki həmin qabığın üzərində süni mum qatı ola bilər.

Bəs alma qabığını yemək olmaz?

Qastroenteroloq vurğulayır ki, almanın qabığı çox faydalıdır. Lifin, polifenolların və bağırsaq üçün faydalı olan bir çox qida maddəsinin böyük hissəsi məhz qabıqda yerləşir. Bu maddələr faydalı bağırsaq bakteriyalarını qidalandırır və bağırsaq divarının sağlam fəaliyyətini dəstəkləyir. Lakin supermarketdən alınan almaları yeyərkən ehtiyatlı olmaq tövsiyə olunur.

Mütəxəssis nə məsləhət görür?

Əgər supermarketdən alma alırsınızsa, həkim onu qabığını soyaraq yeməyi daha təhlükəsiz hesab edir. Onun sözlərinə görə, imkan olduqda üzərinə mum və kimyəvi maddələr çəkilməyən, ekoloji üsulla yetişdirilmiş orqanik almaları seçmək daha məqsədəuyğundur. Belə almalar qabığı ilə birlikdə rahatlıqla yeyilə bilər.

Mum qatını necə təmizləmək olar?

Mütəxəssislər bildirirlər ki, mağazadan alınan almaların üzərindəki mum təbəqəsini azaltmaq üçün meyvəni ilıq axar su altında mətbəx fırçası və ya yumşaq süngərlə diqqətlə təmizləmək olar. Əgər mum qatı qalındırsa, nəm parçaya bir neçə damcı adi süfrə sirkəsi tökərək almanın qabığını dairəvi hərəkətlərlə silmək, sonra isə meyvəni təmiz su ilə yaxşıca yumaq tövsiyə edilir.

Qeyd edək ki, bəzi ölkələrdə istehlakçıların narahatlığını nəzərə alaraq iri pərakəndə satış şəbəkələri almaların süni mumla örtülməsindən mərhələli şəkildə imtina etməyə başlayıblar.

Telegramda izləyin