11 yaşlı idmançıdan Dünya Kubokunda böyük uğur!

11 yaşlı Karabük təmsilçisi, milli idmançı Məhəmməd Fatih Lord İzmirdə keçirilən 2026 CMAS Dünya Kubokunda qazandığı 3 qızıl və 1 gümüş medalla böyük uğura imza atıb.

Sonxeber.az xarici mediaya istinadla xəbər verir ki, 2026 CMAS Dünya Kubokunda çıxış edən gənc üzgüçü Məhəmməd Fatih Lord möhtəşəm performans nümayiş etdirərək 3 dəfə dünya çempionu, 1 dəfə isə dünya ikincisi olub. Bununla o, həm Türkiyəyə, həm də doğulduğu Karabük şəhərinə böyük qürur yaşadıb.

Cəmi 11 yaşı olmasına baxmayaraq, intizamlı hazırlığı və əzmkarlığı ilə seçilən Lord uzun müddətdir məşqçisi Kahraman Demirin rəhbərliyi altında intensiv məşqlər keçirdi. Dünya Kubokunda əldə etdiyi nəticələr bu zəhmətin bəhrəsi kimi qiymətləndirilir.

Səhərin erkən saatlarından başlayan məşqlərlə yarışa hazırlaşan gənc idmançı üzgüçülük üzrə qazandığı nailiyyətlərlə beynəlxalq arenada adından söz etdirib. Böyük şəhərlərin güclü klublarını təmsil edən rəqiblərinə qarşı uğurlu çıxış edən Lord, bu nəticə ilə Karabük idman tarixinə adını yazdırıb.

Məşqçisi Kahraman Demir bildirib ki, gənc idmançının uğuru illərlə davam edən intizamlı hazırlığın, fədakarlığın və səbrin nəticəsidir. O, Məhəmməd Fatih Lordun gələcəkdə daha böyük uğurlar qazanacağına inandığını da vurğulayıb.

Məhəmməd Fatih Lordun uğuru Karabük idman ictimaiyyətində böyük sevinc yaradıb və gənc idmançılar üçün mühüm motivasiya mənbəyinə çevrilib. O, 2026 CMAS Dünya Kubokunu 3 qızıl və 1 gümüş medalla başa vuraraq Türkiyənin sualtı idman növlərində beynəlxalq uğurlarına daha bir nailiyyət əlavə edib.

Telegramda izləyin