Süni intellektlə ifrat ünsiyyət şizofreniyaya səbəb ola bilər - Psixoloqdan XƏBƏRDARLIQ

Real insanlarla dialoq qurmaq əvəzinə süni intellektlə davamlı əlaqədə olmaq insan psixikasına mənfi təsir göstərərək, gizli psixoloji problemlərin üzə çıxmasına şərait yaradır.

Oxu.Az xəbər verir ki, bu barədə psixoloq Andrey Zberovski "Abzas" nəşrinə açıqlamasında bildirib.

Mütəxəssis qeyd edib ki, buradakı əsas təhlükə fərdin cəmiyyət içərisində təbii ünsiyyət vərdişlərini yavaş-yavaş itirməsidir. Virtual həmsöhbətlə ünsiyyət qurmaq olduqca asandır: o, canlı insanlardan fərqli olaraq mübahisəyə girmir, reaksiyanı anında verir və istifadəçinin tələblərinə tam uyğunlaşır. Nəticə etibarilə bu cür rəqəmsal ünsiyyət forması güclü asılılığa gətirib çıxara bilər.

Psixoloq bildirib ki, tamamilə sağlam görünən şəxslərdə belə, özlərinin fərqində olmadığı gizli psixi xəstəliklər əmələ gələ bilər. Kəsintisiz informasiya seli və süni intellektlə davamlı təmas bu cür gizli problemlərin, o cümlədən nevroz, depressiya və hətta daha ciddi pozuntuların aktivləşməsinə zəmin yaradır.

Mütəxəssis, eyni zamanda, paranoyya yaranma ehtimalı barədə də xəbərdarlıq edib: şəxsdə elektron alətlərin və ya ətrafdakıların onu davamlı izlədiyi hissi yarana bilər. Bu səbəbdən neyron şəbəkələrə yalnız qədərində müraciət etmək vacibdir. Xüsusən də mənəvi dəyərlər və fərdi münasibətlər mövzusunda onları heç bir halda real ünsiyyətin alternativi kimi istifadə etmək olmaz.

Telegramda izləyin