Dəniz sahilində açan bu çiçəyi qoparanları yüksək məbləğdə cərimə gözləyir - VİDEO

Türkiyənin Samsun vilayətinin Atakum sahilində təbii şəkildə bitən və nəsli tükənmək təhlükəsi altında olan endemik qum zanbaqları yenidən çiçəkləyib. Ağ rəngli, ətirli çiçəkləri ilə sahilə xüsusi gözəllik qatan bu nadir bitkilər xüsusi mühafizə altındadır.

Sonxeber.az xarici mediaya istinadla xəbər verir ki, Beynəlxalq Təbiəti Mühafizə İttifaqının (IUCN) qorunmalı növlər siyahısında yer alan qum zanbaqlarının təbii yaşayış mühitinin qorunması məqsədilə Samsun Böyükşəhər Bələdiyyəsi Atakum sahilinin İncesu ərazisində xəbərdarlıq lövhələri quraşdırıb.

Qanunvericiliyə əsasən, 2026-cı ildən etibarən qum zanbaqlarını qoparan şəxslər 699 min 245 türk lirəsi məbləğində inzibati cərimə ilə üzləşirlər.

Səlahiyyətli qurumlar vətəndaşları bu nadir bitkilərə zərər verməməyə, onların təbii mühitdə qorunmasına və gələcək nəsillərə çatdırılmasına həssas yanaşmağa çağırırlar.

Sahildə istirahət edən bəzi vətəndaşlar belə yüksək məbləğdə cərimənin tətbiq olunduğunu ilk dəfə eşitdiklərini bildirərək, bundan sonra daha diqqətli olacaqlarını deyiblər. Digərləri isə Atakum sahili boyunca bitən qum zanbaqlarının daha effektiv şəkildə mühafizə edilməsinin vacibliyini vurğulayıblar.

Yay aylarında çiçək açan qum zanbaqları həm estetik görünüşü, həm də bioloji müxtəliflik baxımından Atakum sahilinin ən qiymətli təbii sərvətlərindən biri hesab olunur.

Telegramda izləyin