Paltaryuyan maşındakı "kəpənək" işarəsi nə deməkdir?

Müasir paltaryuyan maşınların idarəetmə panelində müxtəlif işarələr yer alır. Əksər istifadəçilər adətən "Pambıq" və ya "Sintetika" proqramlarından istifadə etsələr də, bəzi simvolların mənası çoxlarına məlum deyil. Onlardan biri də kəpənək işarəsidir. Mütəxəssislərin sözlərinə görə, bu rejim zərif parçaların qorunması üçün nəzərdə tutulub və ondan düzgün istifadə etmək geyimlərin ömrünü uzada bilər.

Lent.az xəbər verir ki, kəpənək simvolu beynəlxalq standartlara uyğun olaraq zərif və ya həssas yuma rejimini göstərir. Bu proqram xüsusi qulluq tələb edən geyim və tekstil məhsulları üçün nəzərdə tutulub.

Bu rejim əsasən aşağıdakı məhsulların yuyulması üçün uyğundur:

təbii ipəkdən hazırlanmış geyimlər;
krujeva və zərif alt paltarları;
nazik sintetik parçalar;
tül və yüngül pərdələr.

Bu proqram əl ilə yumanı təqlid edir. Baraban aşağı sürətlə və yumşaq şəkildə fırlanır ki, parçalar bir-birinə sürtünərək zədələnməsin. Yuma zamanı suyun temperaturu adətən 30°C-dən yuxarı olmur. Sıxma funksiyası isə ya tam söndürülür, ya da minimum dövriyyədə işləyir. Bunun sayəsində parçalar formasını itirmir, dartılmır və deformasiya olmur.

Ən çox edilən səhvlər

Mütəxəssislər bildirirlər ki, bu rejimin üstünlüklərindən yararlanmaq üçün bəzi səhvlərdən qaçmaq lazımdır.

Barabanı həddindən artıq doldurmaq

"Kəpənək" proqramı böyük həcmdə paltar üçün nəzərdə tutulmayıb. Tövsiyə olunan yük təxminən 1-1,5 kiloqramdır. Baraban həddindən artıq doldurulduqda paltarlar yaxşı yaxalanmır və zəif sıxma səbəbindən çox nəm qalır.

Çox çirkli paltarları bu rejimdə yumaq

Bu proqram dərin ləkələri təmizləmək üçün deyil, zərif parçaları yüngül şəkildə təmizləmək və təravətləndirmək üçün hazırlanıb. Əgər paltarda güclü ləkələr varsa, onları əvvəlcədən xüsusi ləkə təmizləyici vasitə ilə emal etmək və daha uyğun yuma proqramı seçmək məsləhətdir.

Qoruyucu torbalardan istifadə etməmək

Zərif parçaların qorunması üçün xüsusi torlu yuma kisələrindən istifadə etmək tövsiyə olunur. Bu torbalar geyimlərin ilgəklərinin və krujevalarının ilişməsinin qarşısını alır, eyni zamanda metal aksesuarların barabana zərər vurmasına mane olur. "Kəpənək" işarəli proqramdan düzgün istifadə etdikdə ipək köynəklər, krujeva alt paltarları, nazik parçalar və digər həssas geyimlər öz formasını və görünüşünü daha uzun müddət qoruyur. Mütəxəssislər bu rejimdən istifadə edərkən paltaryuyan maşının həddindən artıq yüklənməməsini və zərif parçalar üçün qoruyucu torbalardan istifadə olunmasını tövsiyə edirlər.

Telegramda izləyin