Bahalı dönər gündəm oldu: Nazirlik yoxlama apardı - VİDEO

İstanbulun tarixi Kapalıçarşısında çörəkarası dönərin 3 min TL-yə satılması ilə bağlı sosial şəbəkələrdə yayılan görüntülərdən sonra Türkiyənin Ticarət Nazirliyi müəssisədə yoxlama aparıb.

Sonxeber.az xarici mediaya istinadla xəbər verir ki, İstanbul Ticarət İl Müdirliyi və Fatih Bələdiyyəsinin bələdiyyə nəzarətçilərinin birgə keçirdiyi yoxlama zamanı müəssisədə 100 qram dönərin 600 TL-yə satıldığı müəyyən edilib.

Yoxlamanın nəticələrinə əsasən, haqsız qiymət artımı ilə bağlı 4 məhsul üzrə protokol tərtib olunub. Toplanan sənədlər qiymətləndirilməsi üçün Haqsız Qiymət Artımının Qiymətləndirilməsi Şurasına göndərilib.

Bundan əlavə, müəssisədə 12 məhsul üzrə Qiymət Etiketi Qaydalarının pozulduğu aşkarlanıb. Belə ki, məhsulların etiketlərində həcm göstəriciləri (cl/ml) qeyd edilmədiyi üçün obyekt barəsində inzibati cərimə tətbiq edilib.

Türkiyənin Ticarət Nazirliyinin Mətbuat və İctimaiyyətlə Əlaqələr üzrə müşaviri Bekir Kaplan sosial media hesabında bildirib ki, sosial şəbəkələrdə Kapalıçarşıda fəaliyyət göstərən bir müəssisədə dönərin 3 min TL-yə satılması ilə bağlı yayılan paylaşımlardan sonra nazirliyin əməkdaşları dərhal araşdırmalara başlayıblar.

O qeyd edib ki, nazirlik istehlakçıların hüquqlarının qorunması, haqsız qiymət artımlarının qarşısının alınması və ədalətli ticarət mühitinin təmin edilməsi istiqamətində nəzarət tədbirlərini qətiyyətlə davam etdirəcək.

Telegramda izləyin