Ürək sağlamlığını qorumaq üçün bu 3 qidadan uzaq durun

Ürək-damar xəstəlikləri dünyada ölümün əsas səbəblərindən biri olaraq qalır.

Qaynarinfo xəbər verir ki, "HuffPost" nəşrinin məlumatına görə, kardioloqlar və dietoloqlar ürək sağlamlığını qorumaq üçün qidalanmada ediləcək bir neçə sadə dəyişikliyin böyük fayda verə biləcəyini bildirirlər.

Mütəxəssislərin fikrincə, sağlam ürəyə sahib olmaq üçün saatlarla idman etmək və ya yalnız balıq və bitki mənşəli qidalarla qidalanmaq vacib deyil. Ən təsirli addımlardan biri ürək üçün zərərli hesab edilən bəzi məhsulların rasiondan çıxarılması və ya ciddi şəkildə məhdudlaşdırılmasıdır.

1. Bekon

Mütəxəssislər bildirirlər ki, ürək sağlamlığını qorumaq istəyənlər bekonu yalnız nadir hallarda istehlak etməli və ya tamamilə rasiondan çıxarmalıdırlar.

Dietoloq və nutrisioloq Mişel Rautenşteynin sözlərinə görə, bekonun hazırlanma üsulu ürək-damar sisteminə mənfi təsir göstərə bilər.

Onun tərkibindəki yüksək natrium miqdarı arterial təzyiqi artıra bilər. Bundan əlavə, hisəvermə zamanı istifadə olunan natrium nitriti, eləcə də bişirmə prosesində yaranan polisiklik aromatik karbohidrogenlər və heterosiklik aminlər iltihabın artmasına və damarların zədələnməsinə səbəb ola bilər.

Kardioloq Saman Setare-Şenas yalnız bekondan deyil, ümumilikdə emal olunmuş ət məhsulları və qırmızı ətin həddindən artıq istehlakından da çəkinməyi tövsiyə edir.

2. Ağ çörək

Mişel Rautenşteynin sözlərinə görə, mağazalarda satılan ağ çörək və oxşar un məmulatları ürək sağlamlığı üçün əlverişli seçim hesab olunmur.

Yüksək qlisemik indeksə malik olan ağ çörək tam taxıllı çörəklərlə müqayisədə daha az lif və qida maddəsi ehtiva edir. Bu isə qanda şəkərin kəskin yüksəlməsinə, insulin müqavimətinin inkişafına və artıq çəkiyə səbəb ola bilər.

Kardioloq Daniel Luqer də bu fikri dəstəkləyərək bildirir ki, rafinə edilmiş karbohidratlar qanda qlükoza və triqliseridlərin səviyyəsini artıra bilər.

Onun sözlərinə görə, çörək alarkən qablaşdırmada "100% tam taxıllı" qeydinin olmasına və məhsulun tərkibinə diqqət yetirmək lazımdır.

3. Fri kartofu

Mütəxəssislər fri kartofunun da ürək üçün ən zərərli qidalardan biri olduğunu bildirirlər.

Saman Setare-Şenasın sözlərinə görə, qızartma zamanı məhsullar su itirir və çoxlu yağ mənimsəyir. Restoran və ictimai iaşə müəssisələrində yağın dəfələrlə istifadə olunması trans yağların yaranmasına səbəb ola bilər.

Fri kartofunun yüksək duz tərkibi də arterial təzyiqin yüksəlməsi və ürək-damar xəstəlikləri riskinin artması ilə əlaqələndirilir.

Mütəxəssislər qeyd edirlər ki, qızardılmış qidaların müntəzəm istehlakı işemik ürək xəstəliyi, yüksək qan təzyiqi və piylənmə riskini artıra bilər.

Ürək üçün faydalı qidalar hansılardır?

Kardioloqlar ürək sağlamlığını qorumaq üçün mərci, noxud və lobya kimi paxlalı bitkilərin daha çox istehlakını tövsiyə edirlər.

Daniel Luqerin sözlərinə görə, bu məhsullar liflə zəngindir, uzunmüddətli toxluq hissi yaradır, bağırsaqların fəaliyyətini yaxşılaşdırır və faydalı bağırsaq bakteriyalarını qidalandırır.

Mişel Rautenşteyn isə kətan toxumu və badamın da ürək üçün faydalı olduğunu bildirir.

Taxıl məhsulları arasında isə kinoa və tam taxıllı undan hazırlanmış çörəyin seçilməsi tövsiyə olunur. Bu məhsullar lif, bitki mənşəli zülal, fosfor, sink və antioksidantlarla zəngin olduğundan "pis" xolesterinin səviyyəsinin azalmasına, qanda şəkərin tənzimlənməsinə və ürək-damar sisteminin sağlamlığının qorunmasına kömək edə bilər.

Telegramda izləyin