ABŞ-İran danışıqları niyə nəticəsiz qaldı? - POLİTOLOQDAN AÇIQLAMA

ABŞ və İran arasında diplomatik təmasların bərpası istiqamətində səylər hələlik nəticə verməyib. Reuters-in 12 avqust tarixli məlumatına görə, tərəflər iyunda əldə edilmiş müvəqqəti razılaşmanı yenidən işə salmaq məsələsində ortaq mövqeyə gələ bilməyiblər.

Tehran Vaşinqtonun əvvəlki razılaşma üzrə öhdəliklərini yerinə yetirmədiyini bildirir, ABŞ isə İranın Hörmüz boğazının açılması ilə bağlı tələblərini əsas problem kimi göstərir. Bu vəziyyət Yaxın Şərqdə gərginliyin davam edəcəyi və danışıqların taleyinin qeyri-müəyyən olaraq qalacağı ilə bağlı narahatlıqları artırır.

Mövzu ilə bağlı politoloq Rəsul Tağıyev Sonxeber.az-a açıqlamasında bildirdi ki, ABŞ və İran arasında razılaşmanın əldə olunmamasının əsas səbəbi tərəflərin qarşılıqlı güzəştə hazır olmamasıdır. Onun sözlərinə görə, Vaşinqton ilk növbədə İranın Hörmüz boğazında gəmiçilik üçün normal şərait yaratmasını və təhlükəsizlik məsələlərində konkret addımlar atmasını istəyir: "Tehran isə ABŞ-dan əvvəlcə müvəqqəti razılaşmaya qayıtmağı, İranın dondurulmuş aktivlərinin açılmasını və tətbiq olunan məhdudiyyətlərin aradan qaldırılmasını tələb edir. Reuters-in məlumatına görə, tərəflər arasında vasitəçilər üzərindən müəyyən mesajlaşmalar davam etsə də, razılaşmanın bərpası istiqamətində hazırda ciddi irəliləyiş yoxdur. Bu vəziyyət münaqişənin qısa müddətdə diplomatik yolla həll olunacağı ilə bağlı gözləntiləri zəiflədir.

Xüsusilə Hörmüz boğazının statusu məsələsi yalnız ABŞ-İran münasibətlərinə deyil, qlobal enerji bazarına da birbaşa təsir göstərir. Buna görə də tərəflərin danışıqlara qayıtması üçün qarşılıqlı etimadın bərpası və ilkin mərhələdə daha məhdud məsələlər üzrə razılaşmanın əldə olunması vacibdir".

Telegramda izləyin