Azərbaycanın qlobal gündəlikdə yeni mərhələsi: G20 Zirvəsinə dəvət

"Azərbaycan Prezidenti İlham Əliyevin ABŞ Prezidenti Donald Tramp tərəfindən 2026-cı il dekabrın 14-15-də Mayamidə keçiriləcək G20 Liderlər Sammitinə dəvət olunması, şübhəsiz ki, Azərbaycanın beynəlxalq münasibətlər sistemində artan çəkisinin mühüm göstəricilərindən biridir. ABŞ-ın G20 sədrliyi çərçivəsində keçiriləcək sammitdə Azərbaycanın da dəvət olunan ölkələr sırasında yer alması artıq sıradan diplomatik protokol hadisəsi kimi qiymətləndirilə bilməz.

Burada əsas məsələ Azərbaycanın dünyanın ən böyük iqtisadiyyatlarının müzakirə platformasına dəvət edilməsidir. Çünki G20 yalnız iqtisadi məsələlərin müzakirə olunduğu format deyil. Bu platforma qlobal enerji təhlükəsizliyi, ticarət, investisiya, nəqliyyat-logistika, rəqəmsal transformasiya və beynəlxalq iqtisadi münasibətlərin gələcəyi baxımından mühüm siyasi çəkidə olan bir mərkəzdir.

"Bu fikirləri Sonxeber.az-a Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, Azərbaycanın bu platformaya dəvətində ölkəmizin enerji siyasətinin və Şərqlə Qərb arasında formalaşdırdığı nəqliyyat-kommunikasiya bağlantılarının xüsusi əhəmiyyəti var. Azərbaycan artıq yalnız enerji resurslarını ixrac edən ölkə deyil, həm də Avrasiyanın enerji və nəqliyyat xəritəsində mühüm qovşaqlardan birinə çevrilir. Prezident İlham Əliyevin də qeyd etdiyi kimi, Azərbaycanın təşəbbüskarı və əsas iştirakçısı olduğu enerji layihələri bu gün bir sıra ölkələrin enerji təhlükəsizliyinə töhfə verir.

Digər tərəfdən, bu dəvət Azərbaycan-ABŞ münasibətlərinin yeni mərhələsini də nümayiş etdirir. Son dövrdə Bakı ilə Vaşinqton arasında strateji tərəfdaşlığın möhkəmlənməsi fonunda Prezident İlham Əliyevin G20 kimi qlobal platformaya dəvət olunması Azərbaycanın ABŞ üçün də artan strateji əhəmiyyətindən xəbər verir. Prezident İlham Əliyev də bu dəvəti ölkəmizə göstərilən xoş münasibətin ifadəsi kimi qiymətləndirib.

"Hesab edirəm ki, Azərbaycanın G20 formatında iştirakı ölkəmizin diplomatik imkanlarını genişləndirməklə yanaşı, iqtisadi və enerji potensialımızın qlobal miqyasda daha geniş təqdim olunması üçün yeni imkanlar yaradacaq. Azərbaycan burada yalnız öz milli maraqlarını ifadə edən dövlət kimi deyil, Avrasiyanın müxtəlif bölgələrini birləşdirən, enerji və nəqliyyat təhlükəsizliyinə töhfə verən, sabitlik və əməkdaşlıq təşəbbüsləri irəli sürən ölkə kimi çıxış edə bilər.
Bu dəvət həm də onu göstərir ki, Azərbaycanın geosiyasi çəkisi artıq yalnız Cənubi Qafqaz çərçivəsində qiymətləndirilmir. Bakı regional siyasətin iştirakçısından qlobal proseslərdə sözü və mövqeyi nəzərə alınan aktora çevrilməkdədir. G20 dəvətini məhz bu baxımdan Azərbaycanın beynəlxalq nüfuzunun və çoxvektorlu xarici siyasətinin mühüm nəticələrindən biri kimi dəyərləndirmək lazımdır.

Əslində, məsələ təkcə Mayamiyə dəvət deyil. Məsələ Azərbaycanın dünya siyasətinin və qlobal iqtisadiyyatın əsas müzakirə masalarından birinə daha yaxınlaşmasıdır. Bu isə ölkəmizin qarşıdakı illərdə enerji, nəqliyyat, investisiya və geosiyasi əməkdaşlıq sahələrində daha böyük təşəbbüslərlə çıxış etməsi üçün ciddi imkanlar yaradır."-deyə, B.Quliyev əlavə edib.

Telegramda izləyin