"Heydər Əliyev" ordeninin Mirziyoyevə verilməsi Özbəkistanla münasibətlərə uzunmüddətli perspektivdən baxdıldığını göstərir

Azərbaycan Prezidentinin Özbəkistan Prezidenti Şavkat Mirziyoyevi "Heydər Əliyev" ordeni ilə təltif etməsi iki ölkə arasında münasibətlərin yüksək səviyyəsinin və Mirziyoyevin bu əlaqələrin inkişafındakı rolunun siyasi qiymətləndirilməsi kimi dəyərləndirilə bilər. Sərəncamda təltifin məhz Azərbaycan-Özbəkistan arasında dostluq, qardaşlıq və müttəfiqlik əlaqələrinin inkişafındakı xüsusi xidmətlərlə əlaqələndirilməsi də diqqət çəkir.

Bəs, bu təltif Azərbaycan-Özbəkistan münasibətlərinin strateji tərəfdaşlıq və müttəfiqlik səviyyəsinə verilən siyasi qiymət kimi necə dəyərləndirilə bilər və iki ölkə arasında əlaqələrin gələcək inkişafına hansı təsirləri göstərə bilər?

Sonxeber.az-a açıqlama verən politoloq Turan Rzayev bildirib ki, Şavkat Mirziyoyevin "Heydər Əliyev" ordeni ilə təltif olunması Azərbaycan-Özbəkistan münasibətlərinin hazırkı siyasi çəkisini göstərən mühüm mesajdır.

""Heydər Əliyev" ordeni Azərbaycan dövlətçilik tarixinin ən yüksək siyasi simvollarından biridir. Bu ordenin xarici dövlət başçısına verilməsi həmin şəxsin Azərbaycanla münasibətlərin inkişafında xüsusi rolunun dövlət səviyyəsində tanınması deməkdir. Sərəncamın mətnində "dostluq", "qardaşlıq" və "müttəfiqlik" sözlərinin birlikdə işlədilməsi münasibətlərin keçdiyi yolu da göstərir. Dostluq münasibətin mənəvi tərəfini, qardaşlıq onun tarixi və xalq səviyyəsindəki yaxınlığını, müttəfiqlik isə artıq dövlətlərin siyasi münasibətlərində daha konkret mərhələni ifadə edir".

Politoloq bildirib ki, Azərbaycan və Özbəkistan münasibətləri son illərdə sadəcə intensivləşməyib, məzmun etibarilə dəyişib:

"Əvvəlcə siyasi dialoq və strateji tərəfdaşlıq dərinləşdi, daha sonra münasibətlər müttəfiqlik səviyyəsinə yüksəldi. İndi isə "Əbədi dostluq haqqında Müqavilə" ilə tərəflər bu münasibətlərə daha uzunmüddətli siyasi çərçivə verməyə çalışırlar. Mirziyoyevin prezidentliyi dövründə Bakı ilə Daşkənd arasında siyasi təmaslar əvvəlki səviyyədən xeyli genişlənib. İqtisadi əlaqələr, nəqliyyat, enerji, sənaye kooperasiyası, mədəniyyət və təhsil sahələrində əməkdaşlıq paralel şəkildə inkişaf edib. Bu münasibətlərdə şəxsi siyasi dialoqun da xüsusi çəkisi var. Ona görə Mirziyoyevə "Heydər Əliyev" ordeninin verilməsi bir növ "sizinlə qurduğumuz münasibətin siyasi çəkisini biz yüksək qiymətləndiririk" mesajıdır".

Onun sözlərinə görə, burada daha bir mühüm detal var:

"Azərbaycan Prezidentinin Özbəkistan səfərinin ilk günündə iki dövlət başçısı qarşılıqlı şəkildə ali dövlət təltifləri ilə mükafatlandırılıb. Mirziyoyev İlham Əliyevi Özbəkistanın ali dərəcəli "Dostluq" ordeni ilə təltif edib, Əliyev isə Mirziyoyevə "Heydər Əliyev" ordenini təqdim edib. Bu qarşılıqlılıq münasibətlərin yalnız bir tərəfin siyasi jesti olmadığını göstərir. Hər iki dövlət qarşı tərəfin liderinin münasibətlərin inkişafındakı rolunu öz dövlət mükafatı ilə qiymətləndirir. Lakin məncə, məsələnin ən mühüm tərəfi bundan da dərindir. "Heydər Əliyev" ordeninin Mirziyoyevə verilməsi Azərbaycan tərəfinin Özbəkistanla münasibətlərə uzunmüddətli perspektivdən baxdığını göstərir. Bu ad Azərbaycan dövlətçiliyini, dövlət suverenliyini, xarici siyasətin ardıcıllığını və milli maraqların qorunmasını ifadə edən siyasi simvoldur".

Ekspert qeyd edib ki, hazırda ortada yalnız xoş münasibətlər və yüksək səviyyəli qarşılıqlı səfərlər yoxdur:

"Dövlətlər artıq bir-birinin təhlükəsizliyinə, suverenliyinə və ərazi bütövlüyünə hörməti siyasi öhdəlik səviyyəsində təsbit edən, iqtisadi və nəqliyyat əlaqələrini genişləndirən, parlamentlərarası və humanitar münasibətləri dərinləşdirən daha geniş bir əməkdaşlıq çərçivəsi qururlar. Avqustun 23-də imzalanmış "Əbədi dostluq haqqında Müqavilə" də bu prosesin yeni mərhələsini müəyyənləşdirir".

Röyalə Xəyal

Telegramda izləyin