100 yaşdan çox yaşamağın sirri açıldı

100 yaşdan çox yaşayan insanlarla bağlı araşdırma alimlərə sağlam qocalmanın mexanizmləri barədə yeni detallar verib. Yaponiyanın Osaka Universitetinin tədqiqatçıları uzunömürlü insanlarda daha çox rast gəlinən nadir immun hüceyrəsi müəyyən ediblər.

"Qafqazinfo" xəbər verir ki, "Cell Reports" jurnalında dərc olunan araşdırmaya görə, CD4 CTL adlanan xüsusi T hüceyrələrinin sayı insan yaşlandıqca artır.

Bu hüceyrələr gənc insanlarda T hüceyrələrinin 5 faizindən azını təşkil etdiyi halda, 110 yaşdan yuxarı şəxslərdə onların orta göstəricisi 17,6 faizə çatıb.

Tədqiqat çərçivəsində 70-99, 100-109 və 110 yaşdan yuxarı 28 şəxsin qan nümunələri araşdırılıb.

Nəticələrə əsasən, CD4 CTL-lərin orta nisbəti 70-99 yaş qrupunda 4 faiz, 100-109 yaş qrupunda 9,6 faiz, 110 yaş və yuxarı şəxslərdə isə 17,6 faiz olub.

Tədqiqatçılar bu hüceyrələrin xüsusilə uzunömürlü insanlarda genişlənərək, immun sisteminin fəaliyyətinə uyğunlaşdığını müəyyən ediblər.

Alimlərin fikrincə, CD4 CTL-lər orqanizmdə yaşlanmış hüceyrələri hədəf almaq və şişlərə qarşı immun nəzarəti təmin etməklə sağlam qocalmaya töhfə verə bilər.

Osaka Universitetinin dosenti və tədqiqatın ilk müəllifi Kosuke Haşimoto bildirib ki, müəyyən T hüceyrələrinin seçici şəkildə çoxalması immun sisteminin insan çox yaşlandıqdan sonra belə dəyişikliklərə uyğunlaşmağa davam etdiyini göstərə bilər.

Superyüzilliklərin, yəni 110 yaşdan yuxarı insanların immun, ürək-damar və digər bioloji göstəricilərinin yaşlarına nisbətən daha "gənc" xüsusiyyətlər nümayiş etdirə bildiyi qeyd olunur.

Bununla belə, tədqiqatçılar CD4 CTL hüceyrələrinin çoxluğunun uzunömürlülüyə səbəb olduğunu və ya xərçəngdən qoruduğunu hələ sübut etməyiblər. Araşdırmanın növbəti mərhələsində bu hüceyrələrin insan toxumalarında necə fəaliyyət göstərdiyi öyrəniləcək.

Telegramda izləyin