Bu məlumatları süni intellektlə paylaşmaq TƏHLÜKƏLİDİR - AÇIQLAMA

Şəxsi məlumatların, şəxsiyyət vəsiqəsi, pasport, bank sənədləri, tibbi məlumatlar və digər məxfi informasiyaların süni intellekt platformalarına daxil edilməsi məlumatların qorunması baxımından müəyyən risklər yarada bilər. Mütəxəssislər belə məlumatlarla işləyərkən onların hansı məqsədlə toplandığına, necə saxlanıldığına və kimlərlə paylaşıla biləcəyinə diqqət yetirməyi tövsiyə edirlər.

Bəs, istifadəçilər süni intellekt alətlərindən istifadə edərkən hansı şəxsi və məxfi məlumatları paylaşmaqdan çəkinməli, məlumatların platforma tərəfindən necə istifadə olunduğunu və saxlanıldığını necə yoxlamalı, öz məlumatlarını qorumaq üçün hansı əsas təhlükəsizlik qaydalarına əməl etməlidirlər?
Mövzu ilə bağlı Sonxeber.az-a açıqlama verən informasiya texnologiyaları üzrə mühəndis, tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev bildirib ki, süni intellekt platformaları gündəlik işlərimizi asanlaşdırır. Ancaq bu alətlərdən istifadə edərkən şəxsi və məxfi məlumatların qorunmasına diqqət etmək çox vacibdir.

"Süni intellektə yazdığımız məlumatlar arasında ad, soyad, telefon nömrəsi, ünvan, şəxsiyyət vəsiqəsi məlumatları, bank rekvizitləri, parollar və işlə bağlı məxfi sənədlər ola bilər. Belə məlumatların paylaşılması tövsiyyə olunmur. Buna görə süni intellekt alətlərindən istifadə edərkən bir neçə sadə qaydaya əməl etmək lazımdır. Şəxsiyyət vəsiqəsinin məlumatları, parollar, bank kartı nömrələri və digər həssas məlumatlar süni intellektə daxil edilməməlidir. Sənədi təhlil etdirmək lazımdırsa, əvvəlcə ad, ünvan, telefon, imza, hesab nömrəsi və digər məxfi hissələri silmək və ya gizlətmək daha təhlükəsizdir. Şirkətin müştəri siyahısı, müqavilələri, maliyyə göstəriciləri və daxili yazışmaları icazə olmadan süni intellekt platformalarına yükləmək olmaz. Məlumatların necə saxlandığını və hansı məqsədlərlə istifadə oluna biləcəyini öyrənmək vacibdir. Süni intellektdən kömək almaq üçün bütün sənədi və ya bütün şəxsi məlumatları paylaşmaq lazım deyil. Süni intellekt faydalı köməkçidir, amma ondan təhlükəsiz istifadə etmək istifadəçinin də məsuliyyətidir. Məlumat paylaşmazdan əvvəl bir neçə saniyə düşünüb "Bu məlumat məxfidirmi və bunu paylaşmağa həqiqətən ehtiyac varmı?" sualını vermək bir çox riskin qarşısını ala bilər".

Röyalə Xəyal

Telegramda izləyin