Qaradağda sakinlərin şikayəti: Küçələr qaranlığa qərq olur - qəza təhlükəsi yaranır

Qaradağ rayonunun Sahil qəsəbə sakinləri küçə işıqlandırılması ilə bağlı BiG.AZ-a şikayət ediblər.

Sakinlərin sözlərinə görə, saat 20:00-dan sonra Sahil qəsəbəsinin girişində, eləcə də Şahlar Əsgərov, Emin Quliyev, Məhərrəm Seyidov, Bəxtiyar Əliyev və Cənub küçələrində küçə işıqları yanmır.

Sakinlər bildirirlər ki, küçələrin qaranlıq olması səbəbindən axşam saatlarında küçədə hərəkət etmək çətinləşir. Xüsusilə avtomobillərin və piyadaların hərəkəti zamanı görünüş məsafəsinin azalması qəza təhlükəsi yarada bilər.

Onların sözlərinə görə, problemin uzun müddətdir davam etməsi narahatlıq doğurur və küçə işıqlarının bərpası üçün aidiyyəti qurumların müdaxiləsi vacibdir.

Məsələ ilə bağlı BiG.AZ olaraq Qaradağ Rayon İcra Hakimiyyəti ilə dəfələrlə əlaqə saxlamağa çalışsaq da, zənglərimizə cavab verilmədi.

BiG.AZ olaraq məsələni diqqətdə saxlayırıq. Qaradağ Rayon İcra Hakimiyyətinin mövqeyini dərc etməyə hazırıq.

Telegramda izləyin