Təhsildə süni intellektdən istifadə şagirdlərə necə təsir edəcək? - AÇIQLAMA

Süni intellekt təhsil prosesində həm şagirdlər, həm də müəllimlər üçün yeni imkanlar yaradır. Azərbaycanda da süni intellekt əsaslı adaptiv öyrənmə sistemlərinin tətbiqi ilə şagirdlərə fərdiləşdirilmiş tədris imkanlarının yaradılması nəzərdə tutulur.

Bəs, süni intellekt şagirdlərin və müəllimlərin tədris prosesini necə asanlaşdıra bilər, ondan həddindən artıq istifadə şagirdlərin müstəqil düşünmə və öyrənmə bacarıqlarına hansı mənfi təsirləri göstərə bilər və süni intellektdən təhsildə necə düzgün istifadə olunmalıdır?
Mövzu ilə bağlı Sonxeber.az-a açıqlama verən təhsil eksperti Elçin Əfəndi bildirib ki, süni intellekt platformalarından istifadə şagirdləri kağız daşıyıcılarda olan dərsliklərdən uzaqlaşdıraraq onları daha çox texnoloji alətlərə yönəldir.

"Bu isə təhsildən yayınmağa, eyni zamanda şagirdlərin bilik və bacarıqlarının formalaşmasına və möhkəmləndirilməsinə mənfi təsir göstərə bilər. Bu baxımdan mütləq nəzarət mexanizmi tətbiq edilməlidir. Həm valideynlər, həm də müəllimlər tərəfindən şagirdlərin süni intellekt platformalarından həddindən artıq istifadəsinin qarşısı alınmalı, bu imkanlardan yalnız müəyyən hallarda faydalanmalarına şərait yaradılmalıdır. Məsələn, şagird hər hansı mövzunu öyrənərkən və ya dərslikdəki sual və tapşırıqları yerinə yetirərkən çətinlik çəkirsə, süni intellektdən əlavə məlumat almaq üçün istifadə edə bilər. Çünki süni intellektdən davamlı şəkildə istifadə şagirdlərin müstəqil düşünmə və öyrənmə bacarıqlarına mənfi təsir göstərə bilər. Mövcud imkanlardan faydalanmaq olar, amma təhsil prosesində daim süni intellektə üstünlük verilməsi doğru yanaşma deyil".

Röyalə Xəyal

Telegramda izləyin