Onlayn oyunlar uşaqlar üçün CİDDİ TƏHLÜKƏ yaradır - AÇIQLAMA

Onlayn oyunlar uşaqlar üçün əyləncə və sosial ünsiyyət vasitəsi olsa da, bəzi platformalarda onların yaşına uyğun olmayan məzmun, aqressiv davranışları təşviq edən materiallar və müxtəlif təhlükəli çağırışlarla qarşılaşmaq mümkündür. Belə məzmun uşağın emosional vəziyyətinə, davranışına və gündəlik həyatına təsir göstərə, xüsusilə də uzunmüddətli və nəzarətsiz istifadə zamanı müəyyən risklər yarada bilər. Bu baxımdan valideynlərin uşağın onlayn davranışındakı dəyişikliklərə diqqət yetirməsi vacibdir.

Bəs, onlayn oyunlarda uşaqların psixoloji vəziyyətinə mənfi təsir göstərə biləcək məzmun və təhlükəli çağırışlarla qarşılaşması onların davranışında hansı dəyişikliklərə səbəb ola bilər, valideynlər hansı halları təhlükə siqnalı kimi qəbul etməli və belə vəziyyətlərlə qarşılaşdıqda uşağa necə yanaşmalıdırlar?

Mövzu ilə bağlı Sonxeber.az-a açıqlama verən psixoloq Ülkər Məmmədli bildirib ki, onlayn oyunlarda uşaqların qarşılaşdığı zorakı, qorxuducu, manipulyativ məzmun və müxtəlif çağırışlar onların psixoloji vəziyyətinə və davranışlarına mənfi təsir göstərə bilər.

"Xüsusilə emosional baxımdan həssas uşaqlarda aqressivlik, qorxu, narahatlıq, yuxu pozuntusu, sosial təcrid və ailə ilə ünsiyyətdən uzaqlaşma müşahidə oluna bilər. Bəzi hallarda uşaq gördüyü və ya ona deyilənləri təqlid etməyə, təhlükəli davranışları sınamağa və bunu valideynlərindən gizlətməyə çalışa bilər. Valideynlər uşağın internet və oyun istifadəsində qəfil dəyişikliklərə diqqət yetirməlidirlər. Məsələn, uşağın əvvəllər sevdiyi fəaliyyətlərə marağını itirməsi, gecələr gizli şəkildə telefondan istifadə etməsi, həddindən artıq əsəbi və aqressiv olması, yuxu və iştahında dəyişikliklərin yaranması, məktəbdəki davranışının pisləşməsi və oyun zamanı gördükləri barədə danışmaqdan çəkinməsi təhlükə siqnalı ola bilər".

Psixoloq bildirib ki, belə vəziyyətdə valideyn ilk növbədə uşağı qorxutmamalı, danlamamalı və telefonu qəfil əlindən almaqla problemi həll etməyə çalışmamalıdır:

"Uşaqla sakit şəkildə danışmaq, onun qarşılaşdığı məzmunu və kimlərlə ünsiyyətdə olduğunu öyrənmək, təhlükəli hesab olunan hesabları və məzmunu bloklamaq, valideyn nəzarəti vasitələrindən istifadə etmək vacibdir. Əgər uşaqda davamlı qorxu, aqressiya, özünəqapanma və ya özünə zərər vermə ilə bağlı fikirlər müşahidə olunursa, mütləq uşaq psixoloquna və zəruri hallarda digər mütəxəssislərə müraciət edilməlidir".

Röyalə Xəyal

Telegramda izləyin