Banklar kiberhücumlara qarşı nə qədər güvənlidir? - İQTİSADÇIDAN AÇIQLAMA

Bank sistemlərinə qarşı kiberhücumlar artdıqca müştərilərin şəxsi və maliyyə məlumatlarının təhlükəsizliyi məsələsi də daha çox diqqət çəkir. Bankların tətbiq etdiyi təhlükəsizlik sistemləri, iki mərhələli təsdiqləmə və digər qoruyucu mexanizmlərə baxmayaraq, kiberdələduzluq halları ilə bağlı narahatlıqlar qalmaqdadır.

Bəs bankların kiberhücumlara qarşı mövcud təhlükəsizlik tədbirləri nə qədər effektivdir və müştərilərin vəsaitlərinin qorunması üçün görülən tədbirlər kifayət edirmi?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, bankların kiberhücumlara qarşı təhlükəsizlik tədbirlərini tam yetərli hesab etmək çətindir. Çünki bank sistemləri böyük həcmdə maliyyə və şəxsi məlumat saxladığı üçün daim hədəfdədir və hücum üsulları da sürətlə dəyişir. Onun sözlərinə görə, güclü təhlükəsizlik sistemi olsa belə, yeni texnologiyalar və süni intellekt kiberhücumların daha mürəkkəb formalarını ortaya çıxarır: "Bankların qorunması yalnız texniki sistemlərdən ibarət deyil. Məlumatların şifrələnməsi, çoxmərhələli autentifikasiya, əməliyyatların real vaxt rejimində monitorinqi, şübhəli tranzaksiyaların bloklanması və ehtiyat sistemlərinin yaradılması vacibdir. Lakin ən zəif həlqələrdən biri insan faktorudur. Müştərinin fişinq mesajına aldanaraq kart və ya mobil bankçılıq məlumatlarını təqdim etməsi halında ən güclü texniki müdafiə belə risklə üzləşə bilər.

Banklar həmçinin kibertəhlükəsizlik sistemlərini daim yeniləməli, müstəqil audit və nüfuzetmə testləri keçirməli, əməkdaşların və müştərilərin maarifləndirilməsinə diqqət yetirməlidirlər. Xüsusilə bank tətbiqlərində saxta girişlərin və qeyri-adi pul köçürmələrinin vaxtında aşkarlanması mühüm əhəmiyyət daşıyır.

Ona görə banklarda təhlükəsizlik tədbirlərinin olması kifayət deyil, onların kiberhücumların yeni üsullarına uyğun olaraq davamlı yenilənməsi vacibdir. Müasir bankçılıqda kibertəhlükəsizlik birdəfəlik qurulan sistem deyil, daim təkmilləşdirilməli olan prosesdir".

Müəllif: İlkin Məmmədkərimov

Telegramda izləyin