Bakı peşə liseyindən şikayət: "Məni saxta əmrlə işdən çıxarmaq istəyirlər"

16 saylı Bakı peşə liseyinin istehsalat təlimi ustası Zahidə Muxtarova müəssisədə qarşılaşdığı qanunsuzluqla bağlı Yenicag.az-a şikayət ünvanlayıb.

Şikayətdə qeyd olunur ki, sözügedən müəssisənin kadrlar şöbəsi üzrə inspektoru Təranə Şıxəliyeva 28 iyun tarixində Zahidə Muxtarovaya Peşə Təhsili Agentliyinin məktubu əsasında işinə xitam verildiyi ilə bağlı məlumat verib. Lakin müqavilənin qüvvədən düşmə müddəti 15.09.2024-dür. 01.07.2024-də isə müqaviləyə xitam verildiyi bildirilir.

Şikayətçi məktubda belə bir şey olmadığını, yeni vakant yerlərinin açılması ilə bağlı olduğunu diqqətə çatdırıb. Əlavə olaraq, xitam əmrinin saxta, üzərində agentliyin möhürü olmadığını bildirib.

Zahidə Muxtarova sözügedən agentliyə zəng vuraraq, şikayətinə baxılması üçün İnsan Resurları şöbəsindən Özal bəy ilə görüş günü təyin edib. Eyni zamanda, məsələ ilə bağlı Dövlət Əmək Müfəttişliyi Xidmətinə şikayət ünvanlayıb.

Sonrakı günlərdə işinə davam etmək üçün liseyə gedən Zahidə Muxtarova istehsalat təlimi ustalarının baş ustası Sürəyya Məmmədova tərəfindən otağa çağırılaraq, müqaviləsinə xitam verildiyi və işə gəlməməsi ilə bağlı təzyiqlə qarşılaşıb. Müəllim özünü "my.gov.az"da işçi statusunda gördüyünü və xitam əmri göstərilməyənə qədər işə davam edəcəyini deyib.

Zahidə Muxtarova bildirib ki, daha sonra təlim tərbiyə işləri üzrə direktor müavini Azər Əmirov, direktor Günay Mayılova, Sürəyya Məmmədova otağa çağırıb.

"Əmri mənə göstərdilər. Tədris ilinin sonuna qədər müqavilənin bitdiyi qeyd olunurdu. Maraqlı sual yaranır, tədris ili bitibsə, digər müəllimlər bu vaxta qədər fəaliyyətini davam etdirir, ancaq bizə görə tədris müddəti bitmiş sayılır? Məktuba təkrar baxmaq istədikdə müxtəlif bəhanələr gətirdilər. Agentliyə müraciət etməli olduğumu dedilər. Daha sonra Azər Əmirov dedi ki, "nə durmusan, get də, başqa vaxt icazə istəyirsən, bu da sənin üçün ömürlük icazə, get, otur evində". Mən isə bir daha işə gəlib-gedəcəyimi bildirdim. Səhəri gün işə gəldikdə qapıda məni 6 nəfər mühafizə qarşıladı. İçəri buraxmadıqlarına görə iradımı bildirdim, qarşılığında isə polisin çağırılacağı ilə hədələndim. Azər də çöldə idi. Anama "dünən bir Quranlıq söz danışdıq qızının çıxartdığı hoqqaya bax" dedi. Əlavə olaraq, Əmək Məcəlləsinə görə müəssisənin Həmkarlar İttifaqı sədrinin rəyi olmadan işçi azad edilə bilməz. Sədr Səadət Misirova da yanımızda olmasına baxmayaraq, guya xəbəri yox imiş kimi davrandı", deyə şikayətçi qeyd edib.

Əlavə olaraq şikayətçi Peşə Təhsili üzrə Dövlət Agentliyində görüşə getdiyini, lakin laqeyd münasibətlə qarşılaşdığını qeyd edib:

"İnsan Resurları şöbəsindən Özal yüksək tonla danışaraq, məsələnin direktorla müəllim arasında həll olunmalı olduğunu. Həmçinin "istəyirsiniz gedin məhkəməyə verin, ancaq hansı əsasla?", dedi. Məsələnin mediada işıqlandırılacağını bildirdim. Sonra yumşaq münasibət bəslədiyinin şahidi oldum. Həqiqətən də haqlı olduğumu sübut etdim. Nəticədə direktora səhvinin düzəldilməsi üçün göstəriş veriləcəyini söylədi".

Zahidə Muxtarova məsələ ilə bağlı zərərçəkən digər bir neçə nəfərin olduğunu diqqətə çatdırıb:

"Məsələ sübuta yetirildikdən sonra qanunsuz yolla işdən azad edilən müəllimlər geri çağırıldı və işlərinin başında olduqları il bağlı ərizə yazdırıldı. Mən isə yazmadım və müəssisənin səhvidirsə özü düzəltsin dedim".

Peşə Təhsil üzrə Dövlət Agentliyindən Yenicag.az-a həmin liseydəki vəziyyətdən xəbərdar olduqlarını bildiriblər.

"Vətəndaşla görüş keçirilib və məsələ vətəndaşın xeyrinə həll edilib. Müəssisə rəhbərliyinə isə sözügedən vəziyyətlə bağlı xəbərdarlıq edilib", deyə qeyd olunur.

Telegramda izləyin