İsveçin paytaxtı Stokholmda Novruz bayramı münasibətilə tədbir keçirilib

İsveçin paytaxtı Stokholmda Novruz bayramı münasibətilə tədbir keçirilib. SAF İsveç-Azərbaycan Assosiasiyasının təşkil etdiyi bayram şənliyində İsveçin müxtəlif şəhərlərindən 300-ə yaxın diaspor nümayəndəsi, Azərbaycanın bu ölkədəki səfirliyinin əməkdaşları və xarici qonaqlar iştirak ediblər.

AZƏRTAC xəbər verir ki, tədbirin açılış nitqində SAF-ın sədri Sevda Dadaşova, Azərbaycan Respublikası Diasporla İş üzrə Dövlət Komitəsinin tabeliyində fəaliyyət göstərən Azərbaycan Diasporuna Dəstək Fonduna və Beynəlxalq Media Qrupuna göstərdikləri dəstəyə görə təşəkkürünü bildirib.

Niderlandın Azərbaycan Beynəlxalq Klubunun rəhbəri Kəmalə Cəlilova təbrik çıxışında vurğulayıb ki, çoxlu sayda azərbaycanlının bir araya gəlməsi həm sevindirici, həm də qürurverici hadisədir.

"Qardaş ölkənin İsveçdəki diasporu ilə gələcəkdə birgə layihələr həyata keçirmək, əlaqələri daha da inkişaf etdirmək, eləcə də İsveçdə Azərbaycan mədəniyyətini təbliğ etmək və geniş şəkildə tanıtmaq olduqca vacibdir", – deyə Stokholmdakı Şimali Kipr Türk Nümayəndəliyinin rəhbəri Hakan Aksoy qeyd edib.

Tədbir çərçivəsində diaspor nümayəndələri çıxış edərək Azərbaycan xalqını Novruz bayramı münasibətilə təbrik ediblər.

Bayram şənliyinin musiqili hissəsində Azərbaycan və Özbəkistanın Xalq artistləri Gülyaz və Gülyanaq Məmmədova bacıları, Ramazan Şərifzadə və Stokholmda yaşayan azərbaycanlı müğənnilər çıxış ediblər.

Tədbirin sonunda Məmmədova bacıları SAF tərəfindən təşəkkürnamə ilə təltif olunublar.

Telegramda izləyin