Yeni uşaq dünyaya gətirən anaların kredit borcları silinəcək? AÇIQLAMA

Türkiyədə yeni uşaq dünyaya gətirən anaların kredit borclarının silinməsi barədə qanun qəbul edilməsi üçün müzakirələr aparılır.

Bəs görəsən Azərbaycanda da eyni addım atıla bilərmi?

Sosioloq Lalə Mehralı mövzu barədə Sonxeber.az -a açıqlama verib:

"Bu, əslində hər ölkənin özünəməxsus stimullaşdırma üsuludur. Çoxuşaqlılığı təbliğ etmək üçün hər ölkə özünə ən uyğun variantı seçir və onu tətbiq edir. Bəzi ölkələr hər uşağa görə ailələrə müəyyən vəsait, bəziləri valideyinlərə status, bəziləri isə ev və ya torpaq verir. Qısaca, hər ölkə öz mövcud iqtisadi vəziyyətinə uyğun davranır. Türkiyədə də çoxuşaqlılığın təbliği üçün ölkəyə ən uyğun variant düşünüləcək. Hər halda bunun müəyyən bir limiti də olacaq. Məsələn külli miqdarda borca girib sonra uşaq dünyaya gətirmək və həmin borcu sildirmək niyyətində olan fırıldaqçılardan qorunmaq üçün yəqin ki, bəlli bir mexanizim işlənəcək. Yəni, bu qayda hansı hallarda kimlərə şamil olunacaq, kimlər yararlana biləcək və.s kimi məsələlər tənzimlənəcək. Ümumilikdə isə bu addım çoxuşaqlılığın təbliği üçün təqdirəlaiqdir. Ola bilər ki, Azərbaycan üçün də bu üsul əlverişli ola və ya olmaya da bilər. Bu, tamamilə ölkənin iqtisadi vəziyyətindən asılıdır. Lakin, buna bənzər varinatlar həyata keçirilə bilər. Məsələn uşaq dünyaya gətirən ailələrə evlər verilə bilər. Biz bilirik ki, Qarabağa qayıdan vətəndaşlar üçün Bakıda şəhərciklərdə tikilən evlər hazırda boşdur. Dövlət həmin evləri yeni uşaq dünyaya gətirən ailələrə verə bilər. Yəni, oxşar variantlar ölkəmizin daxili potensialına görə tətbiq edilə bilər və bu, istənilən halda müsbət nəticə verəcək".

Telegramda izləyin