Cəmiyyətin və Medianın İnkişafı İctimai Birliyi layihənin icrasına başladı

Cəmiyyətin və Medianın İnkişafı İctimai Birliyi "Erkən nikah və fəsadları: maarifləndirici tədbirlər silsiləsi" adlı layihəsinin icrasına başladı. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.

Layihənin əsas məqsədi maarifləndirmə yolu ilə valideynlərə, həmçinin nikah yaşına çatmayan qız və oğlanlara erkən nikahın fəsadları barədə məlumat vermək, o cümlədən qız uşaqlarının təhsildən uzaqlaşdırılmasının, ailə məsuliyyətini dərk etməyən cütlüyün belə bir yükə məhkum edilməsinin, belə ailələrin uğursuz olmasının, xüsusilə qızların ağır bioloji və psixoloji travma almalarını diqqətə çatdırmaq, həmçinin dövlətin müvafiq strukturlarının bu istiqamətdə apardığı işlərə dəstək göstərməkdir.

Layihə müddətində məqsədəuyğun olaraq, regionlarda maarifləndirici dəyirmi masaların və konfransın təşkil edilməsi, dəyirmi masalarda və konfransda dövlət qurumlarının nümayəndələrinin, mütəxəssislərin, vətəndaşların, həmçinin bu və ya digər şəkildə erkən nikaha məruz qalan şəxslərin iştirakı ilə müzakirələr aparılması nəzərdə tutulur. Bundan başqa erkən nikaha məcbur edilən qızların başına gələn hadisələrin (üzləri görünməmək şərtilə) öz dillərindən videoçarx şəkilində hazırlanıb yayımlanması, ölkədə tanınan şəxslərdən erkən nikah və onun fəsadları mövzusunda müsahibələr alınması və həmin müsahibələrin sosial şəbəkələrdə yayımlanması, Peşə liseylərinə məktəbli qızların, həmçinin valideynlərin səfərinin təşkil edilməsi kimi fəaliyyətlər nəzərdə tutulub.

Layihə 3 ay müddətində həyata keçiriləcəkdir.

Telegramda izləyin