Ramiz Alıyev: "Azərbaycan xalqına qarşı psixoloji terror dalğası əsdirən "bloggerlər" məhkəmə qarşısında cavab verəcəklər"

"Bu gün Azərbaycan polisi dövləti və dövlətçiliyi müdafiə etdiyi, xalqa sədaqətlə xidmət göstərdiyi, ölkəmizi yad ünsürlərdən qoruduğu və onların məkirli niyyətlərinin həyata keçirilməsinə imkan vermədiyi üçün hədəfə çevrilib. Erməni lobbisinin sifarişi ilə fəaliyyət göstərən xarici və daxili düşmənlər, ayrı-ayrı ölkələrin xüsusi xidmət orqanları tərəfindən bu gün Azərbaycanın hüquq mühafizə orqanları, xüsusilə də polisə qarşı qarayaxma kampaniyası aparılır. Həmin dairələrin, lobbilərin buradakı əlaltıları, sifariş yerinə yetirən bir qrup blogger və radikal müxalifət nümayəndələri çirkin kampaniyada xüsusi aktivlik göstərirlər".

Bunu saytımıza açıqlamasında "İnsan Alverinə Qarşı Mübarizə Təşkilatı"nın sədri Ramiz Alıyev bildirib.

Onun sözlərinə görə, dövlət və xalqımıza qarşı gözdənsalma, şantaj və terror siyasəti aparan xarici və daxili qüvvələr bu gün Azərbaycan polisinin ciddi müqaviməti və qətiyyəti qarşısında acizlik nümayiş etdirirlər: "Xaricdən yönələn bütün təhlükələrin qarşısı hüquq mühafizə orqanları tərəfindən vaxtında və lazımi səviyyədə alınıbdır. Güc strukturlarının müqavimətini qıra bilməyən xarici xüsusi xidmət orqanları bizə düşmən mövqedə olan ölkələrin siyasi təsisatlarının və erməni lobbisinin də imkanlarından istifadə edərək dövlətimizə və onu müdafiə edən qüvvələrə qarşı vahid çirkin mövqedən çıxış edir, davamlı siyasət yürüdürlər. Sosial şəbəkələr üzərindən Azərbaycan polisinə qarşı terror aksiyası həyata keçirirlər. Bloggerlik adı ilə fəaliyyət göstərən, əslində isə xarici xüsusi xidmət orqanlarının və erməni lobbisinin maliyyəsi ilə hərəkət edən bu şəxslər Azərbaycan polisinə qarşı düşmən kəsiliblər. Onlar mütəşəkkil şəkildə hüquq mühafizə orqanlarına hücum edir, ən çirkin üsullardan istifadə edərək onları gözdən salmağa çalışırlar. Belələri ictimai fikri öz maraqları naminə dəyişmək üçün müxtəlif yollara əl atırlar".

Dünyanın bütün ölkələrində hər gün cinayət hadisələrinin baş verdiyini qeyd edən R.Alıyev bildirdi ki, Azərbaycan da dünyanın bir parçası olduğu üçün kriminal olaylardan sığortalanmayıb: "Bu gün elə bir dövlət yoxdur ki, orada cinayət törədilməsin. Əsas məsələ odur ki, kriminogen durum hüquq mühafizə orqanlarının nəzarəti altında olsun, cinayətkarların məsuliyyətə cəlb olunması üçün iradə nümayiş etdirilsin. Bütün dünyada, hətta bəlli bir demokratiya və dövlətçilik tarixi, ənənəsi olan ölkələrə Azərbaycan polisi nümunə göstərilir. Bu gün Azərbaycanın sabitlik adası, Bakının isə ən təhlükəsiz şəhər kimi tanınmasının əsas səbəbkarı hüquq mühafizə orqanlarının peşəkar fəaliyyətidir. Bu da müəyyən xarici və daxili ünsürləri ciddi şəkildə narahat edir. Ölkəmizdə əmin-amanlığın olması, polis-vətəndaş birliyi onları qıcıqlandırır. Odur ki, fürsət düşdükcə ən xırda məsələləri şişirdərək polisə qarşı ictimai inamsızlıq yaratmaq istəyirlər. Sosal şəbəkələrdə Azərbaycan polisini gözdən salmaq üçün hər cür vasitəyə əl atan, psixoloji terror həyata keçirən "bloggerlər" dövlət-xalq birliyinə olan güvəni sarsıtmaq məqsədi güdürlər. Onlar Azərbaycana düşmən olan xarici ölkələrin xüsusi xidmət orqanları, erməni lobbisi və beynəlxalq təşkilatlar tərəfindən idarə olunurlar. Azərbaycanı təhlükəsiz və inkişaf edən, firəvan, azad görmək istəyən hər bir vətəndaş psixoloji terrorla məşğul olan "bloggerlər"ə qarşı çıxmalı, öz etirazlarını bildirməlidirlər. İmkan vermək olmaz ki, onlar eybəcər əməllərini davam etdirsinlər. Hüquq mühafizə orqanları da öz növbəsində dövlətçiliyə qarşı fəaliyyət göstərən, cəmiyyətdə terror dalğası əsdirən "bloggerlərin" məsuliyyətə cəlb olunması üçün gərəkən addımları atmaqdadırlar. Əminliklə deyə bilərəm ki, həmin şəxslər həbs edilərək Azərbaycana gətiriləcək və məhkəmə qarşısında cavab verəcəklər".

Telegramda izləyin