700 bal topladı, şəhid oldu – Müşfiq Orucovun yarımçıq qalan arzusu

Ötən gün saytımızda "Azərbaycanın 700 bal toplayanları - 116 nəfər indi harada işləyir və necə yaşayır?" başlıqlı araşdırma yayımlanıb.

Ölkə.Az xəbər verir ki, istinad materialında 700 bal toplayanların siyahısında aprel şəhidi Müşfiq Oucovun adının yer almaması onun yaxınlarının diqqətini çəkib.

Bununla bağlı M.Orucovun ailə üzvləri saytımıza müraciət edib.

Ölkə.Az xatırladır ki, Müşfiq Orucov 1994-cü il sentyabrın 18-də Bakıda doğulub. 7 nömrəli Zəngilan rayon məktəbində oxuyub. Məktəbi "əla" qiymətlərlə başa vuran Müşfiq 700 balla Azərbaycan Texniki Universitetinin Avtomatika və kompüter texnikası fakültəsinə qəbul olunub.

O, Universitetdə oxuya-oxuya həm də şadlıq sarayında ofisiant işləyib. Havalar isinəndə isə axşam saat 19.00-dan səhər 7-yə qədər dondurma sexində çalışırmış.
Şəhid anası bildirir ki, Müşfiq Orucov uşaqlıqdan savadı, tərbiyəsi ilə öz yaşıdlarından seçilib.
Müşfiq bakalavr pilləsini də "əla" qiymətlərlə başa vurub. Anası oğlunun magistraturaya qəbul olunmasını istəsə də, Müşfiq buna razı olmayıb. O, bildirib ki, əgər magistraturaya qəbul olunsa, əsgərliyə gedə bilməyəcək.

O, anasına söz verib ki, hərbi xidmətdən qayıtdıqdan sonra magistratura üçün imtahan verəcək.
Müşfiq Orucovun ailəsinə sonuncu zəngi 2016-cı il mart ayının 27-də gəlib. Anası ilə danışanda Aygün xanım oğlunun harasa getdiyini hiss eləsə də, Müşfiq həqiqəti gizlədib və poliqona gediklərini deyib.
Ana oğlundan ordakı vəziyyəti soruşanda sakitlik olduğunu bildirib.
Aprelin 1-də gecə həyəcan siqnalı verilib, əsgərləri səfərbər ediliblər. Aprel ayının 2-si Tərtərin Talış kəndi istiqamətində gedən ağır döyüşlərdə Müşfiq də iştirak edib. Aprelin 3-də isə şəhid olub. Ayın 4-ü artıq atəşkəs elan olunub.

Elə həmin gün Orucovlar ailəsinə Müşfiqin şəhid olması xəbəri verilib.
Ailəsi Müşfiqlə sadəcə telefon əlaqəsi saxlayıb. Müşfiq solaxay olduğuna görə, yazı yazmağa həmişə ərinib, bu üzdən də məktub yazmırmış.

Ailəsi deyir ki, Müşfiqin piano təhsili də olub.

Məcburi köçkün kimi yataqxanada yaşadıqlarına görə Müşfiqin ən böyük arzusu yaxşı işdə işləyib ailəsi üçün ev almaq olsa da, bu arzusu yarımçıq qalıb.

Allah rəhmət eləsin!

Telegramda izləyin