"8 Noyabr" Elektrik Stansiyası beynəlxalq tərəfdaşlıq əlaqələrinin düzgün qurulması yeni imkanlar yaradacaq" - Ramin Şərifov

"24 İyun 2025 ci il ölkəmizin enerji tarixində mühüm bir mərhələnin başlanğıcı olmaqla yanaşı həm də 44 günlük Vətən müharibəsində əldə edilən möhtəşəm Zəfərin növbəti dəfə əbədiləşdirilməsidir".

Bunu Sonxeber.az-a danışan Kiçik və Orta Biznes Subyektləri və Klublarının Assosiasiyası (KOBSKA) İdarə Heyətinin sədri Ramin Şərifov bildirib.

Ramin Şərifov qeyd edib ki, Azərbaycan Respublikasının Prezidenti İlham Əliyevin rəhbərliyi ilə Mingəçevirdə istifadəyə verilmiş "8 Noyabr" Elektrik Stansiyası Azərbaycanın günbəgün güclənən sənaye və enerji strategiyasının sübutudur:

"Cəmi iki il ərzində reallaşdırılan bu böyük layihə bizim üçün həm texnoloji, həm də siyasi və mənəvi baxımdan xüsusi əhəmiyyət daşıyır.1880 meqavat gücə malik bu stansiya Azərbaycanın enerji potensialını ciddi şəkildə artıracaq. Bu stansiya enerji potensialımızı ciddi şəkildə artırmaqla yanaşı, həm də ölkəmizin regional enerji təhlükəsizliyində rolunu daha da möhkəmləndirəcək".

Ramin Şərifov vurğulayıb ki, cənab prezident İlham Əliyevin uğurlu gələcəyə hesablanan addımları sayəsində ölkə iqtisadiyyatımız hər gün daha güclənir:

Güclü iqtisadiyyatı olan dövlət hər bir sahədə inkişaf etmiş və hər zaman qalib, qüdrətli orduya sahib dövlətdir. Cənab prezident İlham Əliyevin enerji sektorunda düşünülmüş siyasətinin davamı olan "8 Noyabr" Elektrik Stansiyası beynəlxalq tərəfdaşlıq əlaqələrinin düzgün qurulması üçündə yeni imkanlar yaradacaq. Layihənin reallaşmasında İtaliya və Çin kimi strateji tərəfdaş ölkələrlə əməkdaşlıq isə Azərbaycanın artan beynəlxalq nüfuzunun və etibarlı tərəfdaş imicinin nəticəsidir. Hazırda ölkə enerji istehsalının 40 faizini formalaşdıran Mingəçevirin yalnız Azərbaycanda deyil, bütövlükdə Cənubi Qafqazın energetika mərkəzi olan statusunu gücləndirməyə xidmət edəcəkdir

Ümumiyyətlə daxili resurslardan səmərəli istifadə ölkəmizin iqtisadi suverenliyinin və dayanıqlı inkişafının möhkəm təməlini təşkil edir. Azərbaycan Cənubi Qafqazın yeganə ölkəsidir ki, zəngin karbohidrogen ehtiyatlarına, inkişaf etmiş yanacaq-energetika infrastrukturuna və özünü tam təmin edən enerji sisteminə malik dövlətdir. Təbii ki, mövcud təbii ehtiyatlardan, yanacaq-enerji potensialından səmərəli istifadə edilməsi siyasəti Cənubi Qafqazın regional geosiyasi və geoiqtisadi vəziyyəti fonunda ölkənin davamlı iqtisadi inkişafının və iqtisadi təhlükəsizliyinin əsas təminatlarından birini yaradır. Hesab edirəm ki, bu son deyil. Cənab prezident İlham Əliyevin uzaqgörən və düşünülmüş siyasəti nəticəsində Azərbaycan bundan sonra da hər bir sahədəki uğurlu inkişafını davam etdirəcək".

Telegramda izləyin