"Bu gün Özbəkistan-Azərbaycan arasındakı münasibətlər qarşılıqlı etimad və hörmətə əsaslanır" - Ramin Şərifov

"Bu gün Özbəkistan-Azərbaycan münasibətləri etimad və qarşılıqlı hörmətə əsaslanır".

Bunu Sonxeber.az-a danışan Özbəkistan Ticarət Evinin təsisçi – direktoru, Kiçik və Orta Biznes Subyektləri və Klublarının Assosiasiyası (KOBSKA) İdarə Heyətinin sədri, KOBİA ictimai şuranın üzvü Ramin Şərifov bildirib.

Ramin Şərifov qeyd edib ki, Özbəkistan Respublikasının Prezidenti Şavkat Mirziyoyevin iyulun 2-də ölkəmizə səfəri dostluğumuzun, qardaşlığımızın, xalqlarımız arasındakı əlaqələrin günbəgün daha da güclənməsinin bariz nümunəsidir:

"Azərbaycan regionda Özbəkistan üçün strateji tərəfdaşdır. Hər iki xalqları bir-birinə dərin köklər bağlayır. Azərbaycan-Özbəkistan diplomatik münasibətlərinin 1995-ci ildə qurulmasına baxmayaraq, bu iki xalq arasında ənənəvi dostluq və qardaşlıq əlaqələri tarixən mövcud olub. Bu gün bu əlaqələr həm də strateji əhəmiyyətli münasibətlər səviyyəsinə çatıb. Ölkələrimiz arasında fəal siyasi dialoq mövcuddur. Özbəkistan Azərbaycanın ərazi bütövlüyünü və suverenliyini hər zaman dəstəkləyir. Uzun illər davam etmiş Qarabağ münaqişəsində, eləcə də 44 günlük Vətən müharibəsi dövründə də qardaş ölkənin hər zaman Azərbaycanın haqq işini müdafiə etdiyini və müxtəlif platformalarda öz dəstəyini sərgilədiyinin şahidi olduq".

Ramin Şərifov bildirib ki, Azərbaycanın xarici siyasətində ikitərəfli və çoxtərəfli tərəfdaşlıq çərçivəsində qurduğu mövcud münasibətlər dövlətimizin bu istiqamətdə həyata keçirdiyi siyasət Azərbaycanın milli maraqlarına uyğun olaraq reallaşır:

"Ötən müddət ərzində beynəlxalq aləmdə qazandığı nüfuzu və dünya dövlətləri ilə münasibətləri siyasi, iqtisadi, enerji, mədəni və digər sahələrdə dinamik şəkildə inkişaf edib və qarşılıqlı səmərəli əməkdaşlıq daha da yüksəlib. Eləcə də, Azərbaycan və Özbəkistan arasında.

İki dövlət liderlərinin qarşılıqlı səfərləri bu əlaqələrin möhkəmlənməsində müstəsna rola malikdir. Azərbaycan Prezidenti İlham Əliyevin Özbəkistana məlum səfəri çərçivəsində strateji əhəmiyyət daşıyan "Azərbaycan Respublikası ilə Özbəkistan Respublikası arasında müttəfiqlik münasibətləri haqqında Müqavilə"nin imzalanması dövlətlərarası fəaliyyətin möhkəmləndirilməsində yeni səhifənin açılmasıdır.

Cənab prezident İlham Əliyevin 23 avqust 2024-cü ildə Daşkənddə bildirdiyi kimi "Müttəfiqlik münasibətlərinə dair müqavilə iki ölkənin imzalaya biləcəyi ali səviyyədə beynəlxalq sənəddir. Daşkənddə həqiqətən də münasibətlərimizin yeni fəslini deyil, kitabını yazırıq".

İki ölkə arasında bu vaxta qədər imzalanmış sənədlər, dövlət başçılarının qarşılıqlı səfərləri, bu səfərlər çərçivəsində aparılan müzakirələr, imzalanan sənədlər hərtərəfli və strateji tərəfdaşlığın dolğun ifadəsidir. Bir sözlə Azərbaycan və Özbəkistanın müttəfiq olması təkcə tarixi dostluq bağlarından deyil, həm də dövlətlərin bugünkü geostrateji mövqeyinin, sahib olduğu təbii ehtiyatların göstəricisidir".

Telegramda izləyin