Sabunçuda 60 yaşlı kişi tərəfindən 11 yaşlı uşağa qarşı cinsi qısnama - İDDİA

Bakının Sabunçu rayonunun Ramana qəsəbəsində azyaşlıya qarşı seksual hərəkətlər edildiyi iddia olunur.

Oxu.Az xəbər verir ki, bu barədə "Azərbaycan Uşaqları" İctimai Birliyinin sədri Kəmalə Ağazadə sosial media hesabında paylaşım edib.

O qeyd edib ki, 60 yaşlı kişi tərəfindən seksual qısnamaya məruz qaldığı deyilən 11 yaşlı uşaqla görüşüb.

"Azyaşlı ilə görüşdük. Psixo-diaqnostika aparıldı. Uşağın durumu pisdir - qorxu, yuxu pozuntusu, evə qapanma. Ən çox sevdiyi babasından belə qorxur. Ailənin dediyinə görə, təhqiqatçı hadisəni təsdiqləyəcək hər hansı bir sübut olmadığını bildirib", - deyə K.Ağazadə qeyd edib.

Məsələ ilə bağlı Oxu.Az-ın əldə etdiyi məlumata görə, qeyd olunan məsələ ilə bağlı Sabunçu Rayon Polis İdarəsinin əməkdaşları tərəfindən məhkəmə tibbi, məhkəmə-psixiatrik, psixoloji ekspertizalar təyin olunub. Hazırda araşdırmalar davam etdirilir.

Qeyd edək ki, baş vermiş hadisə ilə bağlı ilk məlumat AzTimes.az saytında paylaşılıb.

Telegramda izləyin