Dəhşət doğuran görüntülər: Onlar sadəcə uşaqdır, əllərindəki isə oyuncaq deyil

15 yaşlı Ahmət Minguzzinin küçənin ortasında bıçaqlanaraq qətlə yetirilməsinin ardından məhkəmə qarşısına çıxarılan uşaqların sosial mediada uzun lüləli silahlarla çəkilən görüntüləri ictimaiyyətdə ciddi narahatlıq doğurub.

Sonxeber.az türk mediasına istinadən xəbər verir ki, hadisə təkcə bir qətli deyil, eyni zamanda gənclərin küçələrdə necə nəzarətsiz və təhlükəli bir şiddət mühitinə sürükləndiyini də açıq şəkildə ortaya qoyur.

Jurnalist Emrullah Erdinçin də gündəmə gətirdiyi bu məsələ ilə bağlı ən çox soruşulan suallar hələ də cavabsız qalır: Bu uşaqlar bu silahlara necə sahib olurlar? Bu prosesi kimlər təşkil edir və ya buna kimlər göz yumur? Bu silahlar niyə tapılmır? Və ən önəmlisi: Niyə uşaqların əlində bu qədər asanlıqla silah olur?

Mütəxəssislər bildirirlər ki, qanunsuz silahların yayılması problemi qədər təhlükəli olan digər məsələ – aidiyyəti orqanların bu açıq təhlükəyə qarşı kifayət qədər ciddi tədbir görməməsidir. Sosial şəbəkələrdə sürətlə yayılan görüntülər uşaqların cinayət mədəniyyəti ilə iç-içə böyüdüyünü və küçələrin sürətlə silahlandığını sübut edir.

Ahmətin ölümü ilə sarsılan ictimaiyyət isə "Sabah başqa bir uşaq daha öldürülmədən" əvvəl hərəkətə keçilməli olduğunu vurğulayır. Vətəndaşlar silah əldə etmə yollarının, uşaqların cinayətlə əlaqələrinin və onları bu bataqlığa sürükləyən mexanizmlərin dərindən araşdırılmasını tələb edirlər.

Bu, sadəcə bir qətl deyil – bu, uşaqların göz görə-görə sürükləndiyi sosial çöküşün və təhlükəli gələcəyin xəbərçisidir.

Telegramda izləyin