Nyu-Yorkda kondisioner vasitəsilə yayılan epidemiya 3 nəfərin ölümünə səbəb oldu

Nyu-York şəhərində "Legioner xəstəliyi" kimi tanınan və kondisioner vasitəsilə yayılan legionellozdan üçüncü ölüm hadisəsi qeydə alınıb.

Sonxeber.az xəbər verir ki, bu barədə şəhərin Səhiyyə Departamenti məlumat yayıb.

Məlumatda qeyd edilir ki, xəstəlik ilk dəfə iyulun 25-də aşkarlanıb və qısa müddətdə sürətlə yayılmağa başlayıb.

Üç xəstənin ölümü ilə nəticələnən bu epidemiya daha 67 nəfərdə də aşkarlanıb.

Şəhər rəhbərliyi qripə bənzər əlamətlər hiss edən sakinlərə dərhal tibbi yardıma müraciət etməyi təkidlə tövsiyə edir.

Legioner xəstəliyi - "Legionella pneumophila" bakteriyasının yaratdığı ciddi ağciyər infeksiyasıdır. Bu bakteriya əsasən durğun sularda, baxımsız kondisionerlərin nəm və isti filtrlərində çoxalır. Kondisionerin havası ilə birlikdə asanlıqla yayılaraq, insanların nəfəs aldığı havaya qarışır. Xüsusilə kondisionerli və sıx insanlı mühitlərdə işləyən şəxslər, həmçinin havalandırma sistemlərinin baxımını aparmayan müəssisələrdə çalışanlar daha yüksək risk altındadırlar.

Başlanğıcda soyuqdəyməyə bənzəyən legioner xəstəliyi nəfəs darlığı, öskürək, boğaz ağrısı, burun tıxanıqlığı, sinədə ağrı və allergik əlamətlərlə özünü göstərə bilər. Bəzən qrip zənn edildiyi üçün vaxtında diaqnoz qoyulmur. Bu isə xəstəliyin irəliləməsinə səbəb olur və xüsusilə immun sistemi zəif, tütün istifadə edən, şəkərli və yaşlı insanlarda ölüm riski yaradır. Xəstəlik qan analizi ilə asanlıqla müəyyən oluna bilər.

Telegramda izləyin