"Apple"dan "WhatsApp", "Facebook" və "Temu" ilə bağlı yenilik

"Apple", yenilənmiş "Siri"nin sınaqlarına başlayıb. Rəqəmsal köməkçi artıq "WhatsApp", "Uber", "Amazon", "YouTube", "Facebook", "Threads", "Temu" və "AllTrails" kimi məşhur tətbiqləri birbaşa səsli komandalarla idarə edə biləcək.

Sonxeber.az bu barədə "Bloomberg"ə istinadla xəbər verir.

Məlumata görə, istifadəçilər foto axtarmaq vəredaktə etmək, "Instagram"da şərh yazmaq, alış-veriş səbətinə məhsul əlavə etmək, hətta xidmətdə ekrana toxunmadan giriş etmək kimi əməliyyatları yerinə yetirə biləcəklər. "Siri" tətbiqlərin öz interfeyslərində istifadəçi kimi tam fəaliyyət göstərə biləcək.

Yenilənmiş versiya "Apple Intelligence" texnologiyası və təkmilləşdirilmiş "App Intents" sistemi əsasında qurulub. "Siri" istifadəçinin şəxsi kontekstini daha yaxşı anlayacaq, ekrandakı məlumatlardan xəbərdar olacaq və tətbiqlərə daha dərin nəzarət edəcək.

Yeniliklər "iPhone", "iPad", "Mac" və "Apple Vision Pro"da əlçatan olacaq.

"Apple", həmçinin yeni "Siri"ni öz tətbiqlərində də sınaqdan keçirir. Məsələn, iPhone istifadəçisi "Siri"dən anasının uçuşu və nahar planları barədə soruşduqda, köməkçi bu məlumatı "Poçt" və "Mesajlar" tətbiqlərindən çıxara biləcək.

Qeyd edilir ki, yenilənmiş "Siri"nin istifadəyə verilməsi 2026-cı ilin yazına planlaşdırılır.

"Apple" bank və tibbi tətbiqlərdə bəzi funksiyaları məhdudlaşdıra və ya deaktiv edə bilər ki, daxili testlər zamanı aşkar olunan kritik səhvlərin qarşısı alınsın. Tərtibatçılar hesab edir ki, yenilənmiş "Siri" uğurlu işləsə, "Apple"ın illərdir xəyalını qurduğu tam səsli idarəetmə reallaşacaq.

Telegramda izləyin