Məktəblilər arasında aqressiya artır — Psixoloq səbəbləri AÇIQLADI

Son illər məktəblilər arasında aqressiv davranışların artması, həm müəllimləri, həm də valideynləri ciddi narahat edir. Sosial mediada yayılan məktəb davaları, uşaqların bir-birinə və müəllimlərinə qarşı sərt münasibəti cəmiyyət üçün təhlükəli tendensiyaya çevrilib. Mütəxəssislər bildirir ki, bu aqressiyanın kökündə təkcə ailə mühiti deyil, həm də sosial və emosional təzyiqlər dayanır.

Psixoloq A.Orucova məsələ ilə bağlı Sonxeber.az-a açıqlama verib:

O, bildirib ki, uşaqlarda aqressiyanın formalaşması bir prosesdir və onun arxasında bir çox gizli amillər dayanır:

"Uşaqlar aqressiv doğulmur, onlar gördüklərini model alırlar. Evdə, məktəbdə və ya sosial şəbəkədə zorakı münasibətlərə şahid olan uşaq, bu davranışı ‘normal’ hesab etməyə başlayır. Təəssüf ki, bəzən valideynlər uşağı dinləmək yerinə danlayır və ya qarşısında aqressiv reaksiya göstərirlər. Beləcə, uşaq duyğularını anlamağı deyil, basdırmağı və partlayışla ifadə etməyi öyrənir."

Psixoloq əlavə edib ki, sosial mediada zorakılığın təriflənməsi də bu davranışları stimullaşdırır:

"Şagirdlər arasında ‘mən güclüyəm’ imici formalaşır. Uşaqlar emosiyalarını sözlə yox, hərəkətlə göstərməyə çalışır. Bu da aqressiyanın artmasına səbəb olur."

Mütəxəssis valideynlərə və müəllimlərə çağırış edib:

"Uşaqlara cəza vermək əvəzinə, onları dinləmək və duyğularını ifadə etmələrinə şərait yaratmaq vacibdir. Daxilində yığılan qorxu, hirs və qısqanclıq zamanında dəyərləndirilməsə, aqressiyaya çevrilir. Biz uşaqlara empatiya, səbir və sərhəd hissini öyrətməliyik."

Telegramda izləyin