Ev almaq istədi, 5 min pulu getdi - Qarabağ veteranına qarşı dələduzluq

II Qarabağ savaşının veteranı dələduzluqla üzləşib.

Qaynarinfo xəbər verir ki, hadisə Qusarda baş verib.

Veteran Qadir Hüseynov (şərti) Qusar şəhərindən ev almaq istəyib. Seymur adlı şəxs bu işdə ona yardım edəcəyini bildirib. Lakin bunun müqabilində 5000 manat pul lazım olduğunu deyib.

Qadir Hüseynovun atası hissə-hissə olmaqla həmin məbləği verib. Lakin Seymur vədinə əməl etməyib. Hüquq-mühafizə orqanlarına şikayətdən sonra həmin şəxs saxlanılıb. Məlum olub ki, o başqa bir adama qarşı da torpağına sənəd alacağı vədi ilə 4000 manatlıq dələduzluq edib.

Seymura Cinayət Məcəlləsinin 178.2.2-ci maddəsi ilə ittiham elan edilib və barəsində ev dustaqlığı qətimkan tədbiri seçilib. Cinayət işinə Qusar Rayon Məhkəməsində hakim Əli Cəlilovun sədrliyi ilə baxılıb. Məhkəmə zamanı Seymur verilmiş ittiham üzrə özünü təqsirli bilib.

Məhkəmənin hökmü ilə ona 3 il müddətinə azadlığın məhdudlaşdırılması cəzası təyin edilib. Onun həbsdə və ev dustaqlığında saxlanıldığı 4 ay, 13 gün müddət 1 günə 2 gün hesabı ilə təyin edilmiş cəzadan çıxılıb və üzərində qəti olaraq 2 il, 3 ay, 4 gün müddətinə azadlığın məhdudlaşdırılması cəzası saxlanılıb.

Telegramda izləyin