Saatlarla gəzməyi dayandırın: Elm ömrü uzatmağın "qısa yolunu" açıqladı

Böyük Britaniyada aparılan geniş tədqiqat "nə qədər uzun müddət idman etsək, bir o qədər sağlam olarıq" fikrinin yenidən nəzərdən keçirilməsinə səbəb olub.

Qaynarinfo xəbər verir ki, araşdırmaya görə, ömrü uzadan əsas faktor idman zalında keçirilən saatlar deyil, qısa müddətdə ürək ritmini maksimuma çatdıran intensiv hərəkətlərdir. Gündəlik həyatdakı kiçik sürətli hərəkətlər, məsələn avtobusa çatmaq üçün qaçmaq belə, uzunmüddətli yüngül tempdə gəzintidən daha güclü qoruyucu təsir göstərə bilir.

"European Heart Journal" jurnalında dərc edilən araşdırmada minlərlə orta yaşlı iştirakçının hərəkət məlumatları təhlil edilib və mühüm nəticələr əldə olunub. Həftəlik vaxtının cəmi 4 faizini yüksək intensivlikli fəaliyyətlərə ayıran insanlarda xroniki xəstəliklərin yaranma riski kəskin şəkildə azalır. Qaraciyər xəstəliklərindən böyrək çatışmazlığına qədər səkkiz fərqli ciddi xəstəliyə qarşı daha yüksək müqavimət qeydə alınıb və erkən ölüm riski hərəkətsiz həyat tərzi keçirənlərlə müqayisədə 46 faiz aşağı olub.

İltihablanmaya qarşı yüksək temp

Alimlər bu cür qısa, lakin intensiv məşqlərin təsirini molekulyar səviyyədə izah ediblər. Güclü yüklənmələr orqanizmdə iltihablanma proseslərini zəiflədərək immun sistemini daha aktiv vəziyyətdə saxlayır. Xüsusilə demans riskini 63 faiz, diabet riskini isə 60 faiz azaltması bu metodun effektivliyini daha da ön plana çıxarır. Uzun müddət aşağı tempdə gəzinti əvəzinə qısa, lakin ürək döyüntüsünü yüksəldən hərəkətlər bədənin müdafiə mexanizmini daha çevik edir.

Mütəxəssislər qeyd edirlər ki, hər kəs ağır idman proqramları icra edə biləcək fiziki hazırlığa malik deyil, lakin gündəlik həyatda edilən kiçik dəyişikliklər də kifayət edə bilər. Pilləkənləri sürətlə çıxmaq, yolda tempi artırmaq və ya aktiv oyunlar oynamaq idman zalına getmədən oxşar təsir yarada bilər. Həftəlik cəmi 15-20 dəqiqəlik yüksək intensivlikli hərəkət belə müasir dövrün xəstəliklərinə qarşı əhəmiyyətli qoruyucu təsir göstərə bilər.

Telegramda izləyin