Divandakı pis qoxu və ləkələri aparan vasitə

Mətbəxdə istifadə etdiyimiz qida sodası və qab yuyan vasitə divanın üzərindəki köhnə ləkələri təmizləməyə, xoşagəlməz qoxunu azaltmağa kömək edə bilər.

Təmizliyə başlamazdan əvvəl seçilən vasitə divanın görünməyən kiçik hissəsində sınaqdan keçirilməlidir. Parçanın rəngi və quruluşu dəyişmirsə, təmizliyə davam etmək olar.

Divanın səthinə az miqdarda qida sodası səpin. Bir müddət gözlədikdən sonra divanı tozsoranla diqqətlə təmizləyin. Soda pis qoxunu özünə çəkir, tozsoran isə tük, saç və tozu aradan qaldırır. Lakin soda bəzi tünd rəngli parçaları soldura bilər.

Köhnə yağ ləkələrini çıxarmaq üçün suya cəmi bir damcı qab yuyan vasitə əlavə etmək olar. Məhlul yalnız su ilə təmizlənməsinə icazə verilən parçalarda, azca nəm əski ilə tətbiq edilməlidir. Ləkəni güclü sürtmək əvəzinə yüngül hərəkətlərlə silmək məsləhətdir.

Qab yuyan vasitədən çox istifadə etmək olmaz. Həddindən artıq köpük parçanın liflərinə hoparaq təmizlənən hissəni yapışqan və cod edə bilər. Bu da həmin yerə daha çox toz və kir yığılmasına səbəb olar.

Davamlı qoxuları, o cümlədən ev heyvanlarından qalan qoxunu azaltmaq üçün 9 faizli sirkəni su ilə 1:2 və ya 1:3 nisbətində qarışdırmaq mümkündür. Məhlul parçaya çox islatmadan püskürdülməli və otaq yaxşı havalandırılmalıdır.

Açıq rəngli divandakı qan, sidik və digər üzvi ləkələr üçün hidrogen peroksiddən istifadə edilə bilər. Peroksid ağardıcı təsirə malik olduğuna görə tünd və rəngli parçalarda tətbiq olunmamalıdır.

Su ilə təmizlənməsi mümkün olmayan mikrofiber materiallarda bəzi mürəkkəb və yağ ləkələri spirtlə çıxarıla bilər. Lakin zamşa və digər həssas materiallarda istehsalçının təmizləmə təlimatı yoxlanılmalıdır.

Təmizləyici vasitələri bir-birinə qarışdırmaq olmaz. Xüsusilə ammonyak tərkibli məhsulların ağardıcı və digər kimyəvi vasitələrlə qarışdırılması təhlükəli qaz yarada bilər. Buna görə hər üsulu ayrıca tətbiq etmək və divanın etiketindəki qulluq qaydalarına əməl etmək vacibdir. (lent.az)

Telegramda izləyin