Kəlbəcərdə Böyük Qayıdış: dövlətin təmin etdiyi yeni həyat

"Prezident İlham Əliyevin 21 avqust 2025-ci il tarixli Kəlbəcər səfəri Böyük Qayıdış Proqramının uğurla həyata keçirildiyini göstərən əyani nümunədir. İllərlə yurd həsrəti ilə yaşayan kəlbəcərlilər bu gün müasir evlərdə, rahat şəraitdə yeni həyata qədəm qoyurlar".

Bunu Sonxeber.az-a danışan deputat Şahin Seyidzadə bildirib.

Deputat qeyd edib ki,Prezident İlham Əliyevin sözləri hər bir sakin üçün ümid və inamın təcəssümü oldu: "Biz ədaləti bərpa etdik, haqqımızı bərpa etdik". Doğrudan da, dövlətin yürütdüyü məqsədyönlü siyasət nəticəsində işğal dövründə viran qoyulmuş şəhər indi dünyanın ən gözəl mənzərəli şəhərlərindən birinə çevrilir:

"Kəlbəcərdə salınan yeni yaşayış kompleksləri, təməli qoyulan binalar və infrastruktur layihələri insanların təhlükəsiz və rahat həyatını təmin edir. Təkcə birinci mərhələdə 10 mindən çox insan üçün mənzillərin tikilməsi Böyük Qayıdışın miqyasını göstərir. Məktəblərin, yolların, enerji infrastrukturunun yaradılması, təmizləmə işlərinin aparılması dövlətin bu bölgəyə verdiyi diqqətin bariz nümunəsidir. Kəlbəcərin gələcək inkişafında iqtisadi amil də mühüm rol oynayacaq. Prezident İlham Əliyevin açılışını etdiyi kiçik su elektrik stansiyaları bölgənin enerji təminatına mühüm töhfə verir. Eyni zamanda, arıçılıq və kənd təsərrüfatı sahəsinin inkişafı Kəlbəcərin qədim ənənələrinin bərpasını təmin edir.

Bu gün açılan "Balland-Kəlbəcər" mağazası təkcə yerli bazar üçün deyil, həm də ixrac potensialı baxımından mühüm imkanlar açır. Prezident İlham Əliyevin çıxışında bir daha qeyd olundu ki, Azərbaycan xalqı heç vaxt haqqından imtina etməyib və uzun illər səbrlə, əzmlə bu günə hazırlaşıb. Güclü ordu, güclü iqtisadiyyat və siyasi iradə nəticəsində Kəlbəcər öz sahiblərinə qaytarıldı. Böyük Qayıdış Proqramı yalnız fiziki qayıdışı deyil, həm də mənəvi qayıdışı təmin edir. Bu gün kəlbəcərlilər öz doğma torpaqlarında yenidən dirçəlir, gələcəyə inamla addımlayır. Prezident İlham Əliyevin dediyi kimi, bu, Azərbaycanın bir yumruq kimi birləşməsinin və ədaləti bərpa etməsinin nəticəsidir".

Telegramda izləyin