Yeddi körpənin ölüm işi: Tibb bacıları direktorun üzünə durdular - MƏHKƏMƏ

Respublika Perinatal Mərkəzində baş vermiş yanğınla bağlı cinayət məsuliyyətinə cəlb edilmiş direktor Mehriban Abasquliyeva, Anesteziologiya, reanimasiya və intensiv terapeya şöbəsinin müdiri Hamlet Mustafayev, Dəstək xidmətləri şöbəsinin müdiri Elnur Əhmədlinin məhkəməsi keçirilib.

Teleqraf xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrlik etdiyi prosesdə şahidlər ifadə verib.

Uşaq reanimasiya şöbəsinin tibb bacısı Firuzə Məmmədova bildirib ki, hadisə günü işdə olmayıb.

Onun sözlərinə görə, xəstəxanada aparatların sayı çox olduğuna görə elektrik uzadıcılarından istifadə olunub: "Divarlarda hər uşaq üçün üç elektrik yuvası vardı və çalışdığımız qədər küvəzləri birbaşa elektrik yuvasına qoşurduq. Divarlarda açıq elektrik yuvaları da olurdu".

Firuzə Məmmədova qeyd edib ki, iş çoxluğundan kiməsə nəsə deməyə vaxtları olmayıb: "Uşaqların sayı artdıqca etiraz edə bilmirdik. Bizə deyilirdi ki, uşaqları qəbul etməliyik. İşin çox olduğunu deyəndə Mehriban xanım cavab verirdi ki, kim işləyə bilmirsə, ağ kağıza qol çəksin, işdən çıxsın".

Şahid Həsənova Günel bildirib ki, təqsirləndirilən şəxslərin hər birini tanıyır: "Xəstəxanada tibb bacısı işləmişəm. Yanğın günü işdə deyildim. Gəldim gördüm ki, yanğın baş verib. Mən təzə işləyən vaxtı bu qədər uşaqla işləmirdik. Gedib sözümüzü Mehriban xanıma deyirdik ki, işimiz çoxdur. Mehriban xanım mənim özümə birbaşa deyib ki, işləyə bilmirsənsə, bu ağ kağıza qol çək, bu da qapı, gedə bilərsən. Bizim işdə su içməyə belə vaxtımız olmurdu".

Növbəti məhkəmə prosesi sentyabrın 15-nə təyin edilib.

Qeyd edək ki, ötən il yanvarın 9-da Respublika Perinatal Mərkəzində inzibati binasında yanğın baş verib. Baş Prokurorluq Cinayət Məcəlləsinin müxtəlif maddələri ilə cinayət işi başladıb, ibtidai istintaq Baş Prokurorluğun İstintaq idarəsinə tapşırılıb.

İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş körpə ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci ildə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Cinayət işi üzrə Respublika Perinatal Mərkəzi, bundan başqa, Elçin Gülmalı oğlu Nəcəfov, Vaqif İntiqam oğlu Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıblar.

Telegramda izləyin