Mirfazil Lətifov: "Maşının hər bir detalı orijinaldır"

"Bəziləri VAZ-2105 markalı avtomobili sevmir, amma mən uşaqlıqdan onu çox sevirəm".

Bu sözləri Oxu.Az-a açıqlamasında "Ən orijinal avtomobil" mükafatına layiq görülən Mirfazil Lətifov deyib.

O bildirib ki, avtomobilinin bütün detalları orijinal özünə məxsusdur:

"Bu tədbirdə VAZ-2105 markalı avtomobilim ilə iştirak etmişəm. 1982-ci ilin maşınıdır. Birinci dəfədir belə bir tədbirdə iştirak edirəm. VAZ-2105 markalı avtomobilə düzü çox adamın marağı yoxdur, lakin mən uşaqlıqdan, gözümü açandan onu görmüşəm. O vaxtdan həmin maşına sevgim yaranıb. Onun hər bir detalı orijinaldır. Fara silənlərinə qədər hər bir şeyi üzərindədir. Bəzən nəyisə xarab olur, o vaxt da çalışıram ki, özününkünü tapıb quraşdırım.

Avtomobili bəzən yay aylarında sürürəm, lakin qış vaxtı istifadə etmirəm.

Gələcəkdə xarici ölkələrdə təşkil olunan bu formatda tədbir olarsa, qatılmaq istəyərəm".

Qeyd edək ki, Bakıda Azərbaycan Avtomobil Federasiyası (AAF) və Azərbaycan Respublikası Atçılıq Federasiyasının (ARAF) birgə təşkilatçılığı ilə klassik avtomobillərin və çövkən oyunu, at şousunun bir araya gəldiyi tədbirdə VAZ-2105 markalı avtomobil "Ən orijinal avtomobil" mükafatına layiq görülüb.

Telegramda izləyin