Bakıda dönərçi kuryeri döydü: 1200 manat cərimələndi

Bakının Nizami rayonunda, Qara Qarayev metrostansiyası yaxınlığında yerləşən "Mersin" restoranında insident baş verib. Restoranın dönərçisi Mikayıl adlı şəxs orada kuryer işləyən Naili döyüb.

Qaynarinfo-nun məlumatına görə, Mikayıl barəsində Cinayət Məcəlləsinin 221.1-ci (xuliqanlıq) maddəsi ilə cinayət işi açılıb və məhkəmədə baxılıb.

Məhkəmə materiallarından məlum olub ki, hadisə restoran sahibinin işdə olmadığı vaxt baş verib. Sifarişləri qəbul edən və çatdırılmasına nəzarət edən Mikayıl, kuryer Nailin iş yoldaşı ilə zarafatlaşaraq işləməkdən yayınmasına etiraz edib. O, Nailə "işləmək istəmirsə, müdiriyyətə bildirsin və işdən çıxsın" deyib. Bu səbəbdən tərəflər arasında mübahisə yaranıb. Nail isə kafedən çıxaraq getmişdi.

Mikayıl onu izləyərək Qara Qarayev prospekti 24/67 ünvanının qarşısında saxlayıb və işə qayıtmasını tələb edib. Daha sonra qəflətən yumruqla onun çənəsinə zərbə vurub. Zərbə nəticəsində Nail yüngül xəsarət alıb – çənə və boyun nahiyəsində şişkinlik yaranıb.

Məhkəmənin hökmü ilə Mikayıl təqsirli bilinərək 1200 manat məbləğində cərimə cəzasına məhkum edilib.

Telegramda izləyin