"Ahıllar bizdə çox vaxt qocalar günündə yada düşən, amma gündəlik həyatda unudulan sosial qrup rolunu oynayırlar" - AÇIQLAMA

1 oktyabr dünyada Ahıllar Günü kimi qeyd olunur. Bu gün yaşlı nəslin cəmiyyətdəki yeri, onların sosial vəziyyəti və həyat keyfiyyəti barədə düşünmək üçün mühüm fürsətdir. Ahıllar yalnız keçmişin yaddaşı deyil, həm də gələcək nəsillərə dəyərli irs ötürən bir körpüdür. Bəs, Azərbaycanda ahılların sosial vəziyyəti və cəmiyyətdəki rolu barədə hansı müşahidələr var?

Mövzu ilə bağlı Sonxeber.az-a sosioloq Yusif Nəbiyev danışıb.

O, açıqlamasında qeyd edib ki, Azərbaycanda ahılların sosial vəziyyəti, təəssüf ki, çox zaman "hörmət" sözünün arxasında gizlənmiş passivləşmə formasında müşahidə olunur:

"Cəmiyyət ahıllara formal ehtiram göstərir, amma gündəlik həyat şəraitinə, sosial aktivliyinə və sağlamlıq imkanlarına yetəri qədər diqqət ayırmır. Ahıllar üçün ən vacib resurs onların sosial kapitalıdır. Yaşlandıqca insanlar mal-mülk kimi maddi resurlardan uzaqlaşır və ailəyə, yaxın qohumlara, varsa, yaxın icma şəbəkələrinə üz tutular. Bu bağlar zəiflədikcə, yəni sosial kapitala əlçatanlıq azaldıqca, yaşlı nəsil daha çox sosial izolyasiya və tənha qalma problemi ilə üz-üzə qalır. Düşünürəm ki, cəmiyyətimizdə ahıllar "keçmişin yaddaşı" roluna həddən artıq həbs olunublar. Halbuki "aktiv yaşlanma" konsepti göstərir ki, yaşlılar yalnız xatirə daşıyıcısı deyil, həm də bilik və təcrübənin canlı mənbəyidir. Azərbaycanda isə bu potensialın böyük hissəsi istifadə olunmur. Təcrübə mübadiləsi, könüllü fəaliyyət və ictimai həyatda iştirak imkanları yetərincə geniş deyil.
Nə qədər acı da olsa, ahıllar bizdə çox vaxt qocalar günündə yada düşən, amma gündəlik həyatda unudulan sosial qrup rolunu oynayırlar. Halbuki onların real rifahı və cəmiyyətə inteqrasiyası təmin olunsa, həm sosial həmrəylik möhkəmlənər, həm də gələcək nəsillər yaşlanmaq qorxusunu daha az hiss edərlər. Yaşlanarkən belə aktiv həyata davam edə biləcəklərini görərlər".

Vüsalə İbrahimli

Telegramda izləyin