"Məktəbli avtobusları bütün ailələrin büdcələrinə uyğun olmalıdır" - AÇIQLAMA

Oktyabrın 1-dən etibarən Bakı şəhərində məktəb avtobusları layihəsi pilot formada fəaliyyətə başlayıb.

Layihənin məqsədi şagirdlərin təhlükəsiz və rahat şəkildə məktəbə daşınmasını təmin etməkdir. Artıq 1200-dən çox şagird bu xidmətə qoşulub. İlkin mərhələdə 8 dövlət və 3 özəl məktəb layihəyə cəlb olunub. Qiymətlər 100 manatdan başlayır və məsafəyə, uşaq sayına, eləcə də gedişin tək və ya ikitərəfli olmasına görə dəyişir.

Bəs bu qiymətlər bütün ailələrin maddi vəziyyətlərinə uyğundurmu?

Sosioloq Üzeyir Şəfiyev bu barədə Sonxeber.az -a danışıb:

"Məktəblər üçün avtobusların təşkil edilməsi təqdirəlayiq addımdır. Bu təşəbbüs şagirdlərin təhlükəsizliyi baxımından olduqca vacibdir və valideynlərin narahatlığını müəyyən qədər aradan qaldırır. Lakin burada ən önəmli məqamlardan biri həmin avtobus xidmətlərinin valideynlərin maddi imkanlarına uyğun olmasıdır. Xüsusilə aztəminatlı ailələrin vəziyyəti diqqətə alınmalıdır.

Əgər söhbət dövlət məktəblərinin şagirdləri üçün təşkil olunan avtobuslardan gedirsə, bu zaman sosial ədalət prinsipləri nəzərə alınmalı, bütün şagirdlər üçün bərabər imkanlar yaradılmalıdır. Unutmayaq ki, biz sosial və inklüziv dövlət quruculuğu mərhələsini yaşayırıq. Azərbaycan artıq BMT-nin Dayanıqlı İnkişaf Məqsədlərinə qoşulub. Həmin məqsədlərin əsas şüarı isə "Heç kəsi kənarda qoymamaq"dır. Bu, hər kəs üçün bərabər imkan və şansların yaradılması deməkdir. Məktəbli avtobusları da məhz bu prinsiplərə uyğun şəkildə hər bir şagird üçün əlçatan olmalıdır.

Digər tərəfdən, bu xidmətin keyfiyyətinə də xüsusi diqqət yetirilməlidir. Avtobusların texniki vəziyyəti, sürücülərin peşəkarlığı və məsuliyyəti, təhlükəsizlik qaydalarına riayət olunması mütləq nəzarətdə saxlanmalıdır. Əks halda, təşəbbüs gözlənilən faydanı verməz.

Hesab edirəm ki, bu yanaşmaya daha çevik və sosial baxımdan həssas formada yenidən baxmaq, həm də uzunmüddətli dövlət proqramına çevirmək lazımdır. Çünki məktəbli avtobusları sadəcə nəqliyyat vasitəsi deyil, gələcəyimiz olan uşaqlar üçün təhlükəsizlik, bərabərlik və sosial rifah təminatıdır"

Telegramda izləyin