Hansı qızılbalıqda omeqa-3 daha çoxdur: Təzə, yoxsa konservləşdirilmiş?

İnsan orqanizminin omeqa-3 yağ turşularına ehtiyacı var. Bu maddələri qida əlavələrindən, həmçinin qoz-fındıq, toxum və yağlı balıq kimi məhsullardan əldə etmək mümkündür.

Qaynarinfo "Real Simple" nəşrinə istinadən xəbər verir ki, qızılbalıq da orqanizmi omeqa-3 yağ turşuları ilə təmin edən əsas qida mənbələrindən biridir.

Omeqa-3 yağ turşularının üç əsas növü var: eykozapentaen turşusu (EPA), dokozaheksaen turşusu (DHA) və alfa-linolen turşusu (ALA). Qızılbalıq əsasən EPA və DHA mənbəyidir, ALA isə daha çox bitki mənşəli məhsullarda olur.

Məqalədə qeyd olunur ki, balığın tərkibindəki omeqa-3 miqdarı onun təzə və ya konservləşdirilmiş olmasından, eləcə də fermada yetişdirilməsindən və ya vəhşi təbiətdə tutulmasından asılı olaraq dəyişə bilər.

Nəşr dietoloqlardan omeqa-3 qəbul etmək üçün təzə qızılbalığın daha üstün seçim olub-olmadığını, yoxsa konservləşdirilmiş qızılbalığın da oxşar qida dəyərinə malik olub-olmadığını soruşub.

Təzə və konservləşdirilmiş qızılbalığın qida dəyəri

Mütəxəssislər bildirirlər ki, qızılbalıq sağlam qidalanmanın dəyərli tərkib hissəsidir. Diplomlu diyetoloq və fərdi məşqçi Van Na Çunun sözlərinə görə:

"Qızılbalıq yüksək keyfiyyətli zülal, ürək üçün faydalı omeqa-3 yağ turşuları, həmçinin D vitamini və selen kimi vacib qida maddələri ilə zəngindir".

Profilaktik kardiologiya üzrə ixtisaslaşmış dietoloq Mişel Rutenşteyn isə qeyd edir ki, bu yağlı balıq orqanizmdə iltihabın azalmasına, həmçinin beyin və göz sağlamlığının qorunmasına kömək edə bilər.

Ekspertlərin sözlərinə görə, təzə və konservləşdirilmiş qızılbalığın qida tərkibi ümumilikdə oxşardır, lakin müəyyən fərqlər mövcuddur.

ABŞ Kənd Təsərrüfatı Nazirliyinin məlumatına görə, 85 qram bişirilmiş təzə (fermada yetişdirilmiş Atlantik) qızılbalıqda:

* 175 kkal
* 18,8 q zülal
* 10,5 q yağ
* 1,24 q DHA
* 0,586 q EPA
* 51,8 mq natrium
* 35,2 mkq selen
* 11,1 mkq D vitamini
* 2,38 mkq B12 vitamini var.

Eyni miqdarda konservləşdirilmiş qızılbalıqda isə:

* 117 kkal
* 19,6 q zülal
* 4,27 q yağ
* 0,632 q DHA
* 0,284 q EPA
* 324 mq natrium
* 33,6 mkq selen
* 12,3 mkq D vitamini
* 4,21 mkq B12 vitamini var.

Bu nəticələr nəyi göstərir?

Məqalədə vurğulanır ki, həm təzə, həm də konservləşdirilmiş qızılbalıq orqanizmi oxşar qida maddələri ilə təmin edir, lakin onların miqdarı fərqlənir. Van Na Çun bildirir: "Həm təzə, həm də konservləşdirilmiş qızılbalıq vacib qida maddələrinin əla mənbəyidir".

Onun sözlərinə görə, hər iki variantın üstün və zəif tərəfləri var. Konservləşdirilmiş qızılbalıq daha rahat və büdcəyə uyğun seçimdir. O, bir qədər çox zülal, D və B12 vitamini ehtiva edir, eyni zamanda kalorisi daha azdır.

Bununla yanaşı, təzə qızılbalıq yeməyə əlavə olunan duzun və digər inqrediyentlərin miqdarına tam nəzarət etməyə imkan verir.

Amerika Ürək Assosiasiyası qeyd edir ki, natrium qəbuluna nəzarət xüsusilə yüksək arterial təzyiqi olan insanlar üçün vacibdir. Bundan əlavə, təzə qızılbalıq omeqa-3 yağ turşuları və selen baxımından daha zəngindir.

Nəticə etibarilə, hər iki məhsul qida baxımından dəyərli seçim hesab olunur.

Hansı qızılbalıqda omeqa-3 daha çoxdur?

ABŞ Kənd Təsərrüfatı Nazirliyinin məlumatına əsasən, təzə qızılbalıq konservləşdirilmiş qızılbalıqla müqayisədə təxminən iki dəfə çox DHA və EPA omeqa-3 yağ turşuları ehtiva edir.

Mişel Rutenşteyn bildirir ki, konservləşdirmə prosesi zamanı omeqa-3 yağ turşularının müəyyən hissəsi itirilə bilər.

Omeqa-3 baxımından hansı daha faydalıdır - fermada yetişdirilən, yoxsa vəhşi qızılbalıq?

Ekspertlərin sözlərinə görə, "Foods" jurnalında dərc olunmuş araşdırmaya əsasən, hər iki növ qızılbalıq təxminən oxşar miqdarda omeqa-3 yağ turşuları ehtiva edir. Bununla belə, vəhşi qızılbalıq omeqa-6 və omeqa-3 nisbəti baxımından daha əlverişli göstəriciyə malikdir.

Beləliklə, istər təzə, istər konservləşdirilmiş, istər fermada yetişdirilmiş, istərsə də vəhşi qızılbalıq olsun, onların müntəzəm istehlakı orqanizmin omeqa-3 yağ turşularına olan tələbatının ödənilməsinə kömək edə bilər.

Mişel Rutenşteyn qeyd edir: "Ən yaxşı qızılbalıq növü müntəzəm olaraq yediyiniz qızılbalıqdır. Əgər rasionunuzda konservləşdirilmiş qızılbalıq daha çox yer alırsa, bu məhsul sizin üçün omeqa-3 yağ turşularının daha praktik mənbəyinə çevrilir".

Telegramda izləyin